فِدوة عيونك

فِدوة عيونك لو غدت روح مِغليك

                                وش عاد لو راحت لعينك عشاير

أبيع ما يِغلَى علَى الكون واشريك

                                واسوق لَى جَتني علومك بشاير

وازعل جميع النّاس بالحيل وارضيك

                                واصبر ولو دارت علَيْ الدّواير

وَاخِذْ من ايّامي لك أيّام واعطيك

                                وان راح عمري لكْ فلا هو خساير

أحب أنا شوفك وصوتك وطاريك*

                                دايم وفكري فيك هايم وحاير

بالصّمت أهوجس بك وبالصّوت أناديك

                                والله عليم البيّنه والسّراير

أنا وقلبي والهوَى بين أياديك

                                عندك مفاتيح الهنا للضّماير

من روحي آحبّك ومن روحي أفديك

                                يا مَنْ غرامه والحسن فيه ثاير

*طاريك: ذكرك.