بالفيديو - عمر كمال يثير الجدل بلجوئه الى الأزهر

نشر مغنّي المهرجانات عمر كمال عبر حسابه الخاص في تطبيق "تيك توك" مقطعاً مصوّراً رد من خلاله على الانتقادات والرسائل التي تأتيه من بعض الجمهور وتؤكد أنه أعماله الخيرية لن تُقبّل لأنه جمع أمواله بالحرام.

وظهر عمر في الفيديو وهو يطالب شيوخ الأزهر بالرد عليه وتوضيح الأمر له، مشيراً إلى أنه يقوم بالكثير من أعمال الخير لكنه لا يكشف عنها.

وقال عمر كمال: "أنا مش بعمل فيديوهات خالص عمري ما عملت فيديو عشان خير وأطلع بسببها تريند، أنا مقتنع أن الخير اللي في السر ربنا بيكرم عنه أضعاف اللي في العلن، أنا ربنا كرمني آخر كرم عشان أنا علاقتي بربنا كويسة، أنا أظن ذلك. بس أنا بجد تعبت من الناس نفسياً أوي وعايز حد من الأزهر يطلع يرد عليّ يا ريت أي شيخ من الأزهر يطلع يرد، أي حاجة بعملها في حياتي يطلع حد يقولي أصل معنى الكلام "ربنا طيب لا يقبل إلا طيب"، أوكي أنا بعمل إيه غلط أنا بروح أغني في فرح بفرّح ناس، بروح أغني في عيد ميلاد في حفلة تخرّج أنا كعمر كمال عمري في حياتي ما طلعت في لايف أو فيديو قلت بعمل خير بس أنا اللي عايز عملية بعمله أو اللي عايز يساعد في إيجار بعمله أو اللي سقف بيته مش موجود بعمله، أنا بعمل اللي أقدر عليه".

وأضاف: "أنا فرقتي شايل مسؤولية 50 أو 60 فرد فرقتي واللي شغالين معايا وأهلي واللي عايزين علاج، إنت بقى عملت إيه؟ أصل أنت فلوسك حرام؟ أنا فلوسي حرام بساعد بيها أنت بقى عملت إيه؟ اللي عايز يغسل كلى مرتين تلاتة في الشهر أنا عملته لكن أنت عملت ليه إيه؟ واللي سقف بيته الشتاء داخل عليه أنا ببنيه، أنت عملت إيه؟ أنت اضطرتني إني أقول".

وأردف بالقول: "أنا عايز أعرف من أي شيخ في الأزهر أنا بعمل خير بجيب من هنا بحط هنا، دا غلط ولا صح حد يقولي مين فينا اللي صح هما ولا إحنا، لو أنا غلط أبطل أعمل خير خالص عشان أنا تعبت نفسياً، كل شوية حد يقولي أصل أنت مش بتعمل، أصل أنت مش هيتقبل منك، أنا شايل فرقتي وشايل أسرتي وشايل السواق وعيلتي والناس اللي جيبت لها علاج وعمليات، يا رب كل واحد في المجتمع يبقى زي عمر كمال كده يشيل شوية عشان محدش يبقى فقير أصلًا".

واختتم عمر كمال كلامه قائلاً: "أنا مش فاهم كل ما اتكلم يتقالي أنت نجحت في إيه؟ نجحت في المجال اللي عايز أنجح فيه، نجحت إني أجيب العربية اللي بحبها، نجحت أني أعيّش أهلي عيشة كويسة، نجحت إن فرقتي 25 شخص وناس ببعتلهم علاج وناس بدفع لهم إيجار أنا نجحت في كده، أنت مش عايزني أنا أبعت تمام أنا فلوسي حرام، أنت هتبعت إيه؟".