هند صبري تكشف تفاصيل "البحث عن علا 2"

23 أيلول 2024 | القاهرة - "لها"

هند صبري

كشفت الفنانة هند صبري في المؤتمر الصحافي الذي عُقد للإعلان عن عرض الجزء الثاني من مسلسل "البحث عن علا"، تفاصيل التجهيز للمسلسل، وخطوات تنفيذه، خاصة أنها تشارك فيه كمنتج ومشرف على ورشة الكتابة، بالإضافة إلى دور البطولة، ولماذا وقع الاختيار على ظافر العابدين، وكيف تم التواصل معه وغيرها من التفاصيل.

وقالت هند: "في الجزء ده من "البحث عن علا" إحنا بنكمل مشوار "علا" في البحث عن نفسها، اللي عمره ما بيتوقف أو يوصل لمرحلة النهاية طول ما الإنسان عايش". وتابعت: "كنا حريصين إننا نحافظ على "علا" اللي الناس عرفتها وحبتها، منروحش بيها في أي حتة الناس ما تتقبلهاش، لازم تعمل اللي الناس منتظرينه منها هيزعلوا، عشان كده قررنا البداية من الشغل، ومحاولاتها التوازن بين شغلها وبيتها وولادها، ده التحدي اللى كلنا فعلا بنواجهه وأنا شخصياً بواجهه وحاسة إني بلعب بالكرات في السيرك وخايفة حاجة تقع مني".

وعن سبب اختيار الفنان ظافر العابدين لبطولة المسلسل، قالت هند صبري: "أنا وظافر أصدقاء، أنا كلّمته من 12 سنة عشان يشارك في مسلسل "فيرتيغو"، وكمان أنا في "البحث عن علا" منتجة، فطبيعي إني أكلّمه، ظافر معندوش هوس النجم الأوحد اللي يرفض يشارك في عمل مش بطولته المطلقة، وإحنا بنكتب دور (كريم عابد) من البداية كنا شايفين ظافر، هو اللي اتوفرت فيه كل صفات الشخصية (وسامة زيادة زي ظافر وقبول وكاريزما وبيتكلم فرنساوي) فمكانش قدّامنا غير ظافر أو إننا نعمل كاستينغ وندوّر على حد جديد".

وأضافت: "كمان بالإضافة لكل ده ظافر من محبي "البحث عن علا" هو وأسرته، وبنته كلّمتني كتير عن الجزء الأول لما قابلتها في لندن، ورحّب فور العرض عليه لأنه حابب عالم "علا"".

وعن سبب تصوير بعض المشاهد في فرنسا، قالت هند صبري: "اقتراح التصوير في فرنسا كان فكرتي، الإنتاج اتخض لما عرضت عليهم الفكرة، لإن التصوير في باريس مُكلف وصعب، لكن القصة بشكل عفوي ذهبت بنا إلى فرنسا وكان في مقدّمات لده من الجزء الأول، والكواليس بالنسبة لي كانت صعبة ومجهود كبير كممثلة ومترجمة ومنتجة كنت بشتغل كل حاجة، لكن الأجواء كانت لطيفة وضحكنا كتير، وأقدر أقول إن دلوقتي بقى في اتنين "باريس" باريس "إميلي" وباريس "علا"".