محمد سامي يوجّه رسالة الى تامر حسني... والأخير يردّ

وجّه المخرج محمد سامي عبر حسابه الخاص في "فيسبوك" رسالة شكر الى الفنان تامر حسني، لأنه منحه فرصة كبيرة ودعمه في بداية مشواره الفني من خلال مسلسل "آدم"، مؤكداً أنه كان سبباً في النجاح الذي وصل إليه اليوم.

وقال محمد سامي في رسالته: "ولا تنسوا الفضل بينكم، وأنا قاعد إمبارح في التصوير افتكرت الرحلة والشقى والتعب من أول عمل لحد العمل اللي بصوّره دلوقتي، وافتكرت صعوبة الحصول على فرصة عشان الواحد يثبت نفسه ويحقق أحلامه، فطبعاً افتكرت أخويا وصاحبي الجدع الطيب الخلوق اللي دعمني من أول لحظة، وكان سبب في اللي أنا فيه دلوقتي".

وأشار إلى أن تامر حسني قدّم له كل الدعم والحب والإمكانيات التي ساعدته في أن يثبت نفسه، في وقت كان من الصعب فيه أن يأخذ الشباب فرصة في الدراما بحجم مسلسل "آدم"، قائلاً: "فاكر إن الكل كان رافض إني آخد الفرصة دي ومستكترينها عليا إلا هو وقف في ظهري كأنه بيحارب لأخوه، وبصلّي مرة والظروف كلها ضدي وكنت حاسس وأنا بحضّر إنهم هيجيبوا حد غيري وقال لي ده مسلسلك وهتعمله وهتنجح وهتنجحنا معاك، حتى طريقته المتواضعة وهو بيقول لي "مسلسلك" كأني عامل 9 مسلسلات قبله، تحسس الواحد بنفسه وأهميته، أشهد أمام الله إنك طول عمرك متواضع ومؤدب وتطلب الحاجة باحترام، ومع الكرو - طاقم العمل - محترم وعشان كدة كلنا روحنا فيك، بحبك يا صاحبي وتستاهل كل حاجة حلوة يا أجمل قلب، ويا رب يرزق كل الناس باللي يساعدهم على تحقيق أحلامهم زي ما رزقني بتامر حسني".

من ناحيته، ردّ الفنان تامر حسني على منشور محمد سامي، موجّهاً الشكر إليه، ومؤكداً أنه آمن بموهبته من البداية، ولافتاً الى أن نجاحاته الأخيرة دليل على موهبته الحقيقية والتي جعلته مكسباً للصناعة.

وكتب تامر حسني تعليقاً على منشور محمد سامي: "يا سامي يا حبيبي يا ابن الناس الطيبين شكراً من كل قلبي على كل حرف خارج من قلبك كتبته في حقي، خلّتني أدمّع يا سمسم، أولاً أنا صدّقت موهبتك من وأنت صغير في السنّ لإنك فعلاً موهوب موهبة مش عادية وتاريخ نجاحاتك يشهد بكده، كنت عارف وأنا بقدّمك إني بقدّم مكسب حقيقي للصناعة ومن يوم ما سجّلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنّك، أب مصدّق في ابنه وعارف إن الناس مش هيدّوله فرصة يطلع عشان سنّه صغير".

وأضاف: "الحمد لله على رحلتك ورحلتي أثبتنا للدنيا إنها مش بالسن لأ!... بالمجهود والتعب والشطارة والمذاكرة وأنت كل الصفات دي كانت عندك، وأنا لوحدي اللي عارف، عشان كده صمّمت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس... مسلسل "آدم"، فيلم "أهواك" وفيلم "تصبح على خير"...، ولسّه إن شاء الله نجاحات جاية مستنيانا مع بعض، ربنا يوفقك يا حبيبي في كل شغلك اللي جاي وتكسّر الدنيا وفي القمة زي عادتك، يا محمد شكراً تاني على المنشور الصادق ده، شكراً يا أصيل يا محترم، ربنا يخلينا دايماً لبعض ضهر وسند".

مجوهرات Tiffany & Co تتمسك بثلاثية الحب والحرفية والتراث

مقالات ذات صلة

مجوهرات Tiffany & Co تتمسك بثلاثية الحب والحرفية والتراث

محمد سامي تامر حسني مسلسل آدم فيلم أهواك فيلم تصبح على خير نجوم الفن مشاهير الفن