إشترك
انتشر خلال الساعات الماضية على مواقع التواصل الاجتماعي فيديو ظهرت فيه سيدة مصرية تُدعى عزة الفقي، وهي تطلق صرخة استغاثة ضد الفنانة هنا الزاهد ووالدتها شيرين المنزلاوي، وتتهمهما بأنهما سكنا في "الكومباوند" الخاص بها من دون دفع إيجار، مشيرةً إلى أن الفنان طلعت زكريا هو الذي توسّط لهما في ذلك.
وظهرت السيدة في الفيديو وهي تقول: "في يوم جاتلي مكالمة من السيدة شيرين المنزلاوي والدة الفنانة هنا الزاهد، قالت إنها عاوزة تأجر المكان، وزوجي رد عليها بأنه يرفض الإيجار لأنه مش ضامن سفره هيخلص إمتى وهيكون محتاج البيت، وخلصنا الموضوع".
وأضافت: "كنا رافضين تأجير البيت، لكن جاءت لنا مكالمة من الفنان الراحل طلعت زكريا، وتوسط لهما على مسؤوليته الشخصية، ووافقنا وكانوا يريدون أن يؤجروا خمس سنين، ولكن طلعت زكريا قال وقت ما ترجعوا البيت هيكون في الحفظ والصون، فإحنا كأسرة اقتنعنا بكلامه وقلناله نأجر 3 سنين فقط، وشيرين مضت العقد بـ 3 سنين وابتدوا يدفعوا الإيجار وساعات كانوا بيأخروا دفع الإيجار بسبب ظروف الشغل... ولما كلّمناهم إنهم يرجّعولنا البيت لما رجعنا مصر، رفضوا وإحنا بنقولهم دا بيتنا ومضطرين نرجع البيت، وإحنا مأجرين أغلى من اللي بتدفعوه وشيرين ردّت عليا، وقالت ألفاظ بشعة، وقالت إحنا مش خارجين وأعلى ما في خيلكم اركبوه".
وتابعت: "اضطرينا نرفع قضية باسترداد البيت والمحكمة الحمد لله وافقت إنهم يخرجوا برا البيت، ويدفعولنا لحد نهاية عقد الإيجار واحنا طلبنا البيت قبل المدة ما تنتهي، وفي الفترة اللي خدنا فيها الحكم كان عقد الإيجار خلص، خطوبة هنا الزاهد اتعملت في بيتي وجنينتي من غير ما يدفعوا إيجار وبعد مدة العقد ما خلصت اتحكم ليهم بالطرد، وهما خرجوا من البيت بصعوبة ودخلنا البيت لقينا فيه تلفيات وخدوا الأحواض".
واختتمت السيدة حديثها بالقول: "كنا مخليين على جنب مخزون سيراميك اتاخد، ورفعنا قضية تانية بالتلفيات وبسنتين الإيجار بعد ما عقدهم خلص، وهما كانوا بيرفعوا قضايا ضدنا، ولكن القضاء نصفنا وحكم لنا، ولكن مش عارفين ليهم عنوان... أخو شيرين المنزلاوي كلّمنا يساومنا إننا ندّيهم فلوس عشان يخرجوا من البيت، والقضايا شغّالة وحاولنا التواصل معاهم من خلال المخرجة منى الأبحر، إنهم يدفعوا اللي عليهم معرفتش توصل معاهم لأي نتيجة، وشيرين المنزلاوي أهانت جوزي وإدت السماعة لهنا قالت له أنت موّتت أبونا، وجاي تموت أمنا وأنا مش عارفة هي إزاي تقول كده، وهي عارفة إن عليهم فلوس ومخالفات، ومستغربة لما شفت لقاء تلفزيوني لهنا الزاهد شكّيت في نفسي وقولت بيروحوا يناموا على المخدة إزاي وعندهم كام وش، وإحنا مصمّمين على حقنا وفيه محضر بيلزمها بإصلاح التلفيات، ومش عارفة هما إزاي ورا الكاميرا ناس تانية كده".
