صفاء جلال تكشف تفاصيل نجاتها من الموت وهذا ما تطالب به الجمهور

30 آذار 2024 | القاهرة - "لها"

كشفت الفنانة صفاء جلال، تفاصيل نجاتها من موت محقق بعد تعرضها لحادث سير مروع خلال الفترة الماضية، مؤكدة أن الصدقات التي تخرجها للمحتاجين السبب في نجاتها وفي حياتها ككل.

وقالت صفاء: "ربنا بيوريلي بركة الصدقة طول الوقت، أنا كنت ماشية بالعربية والطريق فاضي على سرعة 80، على دائري المعادي والطريق مكنش زحمة، وفجأة العربية اللي قدامي دخلت في العربية اللي قدامها وأنا دخلت فيها.

وتابعت: "الحمد لله الوسادة الهوائية اتفتحت واتصابت بحرق بسيط في إيدي ونص العربية باظ الحمد لله، ده ربنا فداني وسترها معايا، حوادث زي دي الناس بتموت فيها، دي لحظة مميتة جدًا".

ودعت صفاء جلال جمهورها للتصدق على المحتاجين، قائلة: "الأيام دي صعبة على الناس كلها ومفيش حد معندوش ضائقة مادية، وأنا بأدعو الناس كلها على قد ما تقدر تطلع صدقات للناس اللي شغالة في النظافة والحمامات، لأن دي ست سايبة بيتها ونازلة في رمضان، وأنت واخد ولاد ورايح سينما اللي هتديه ليها ولا حاجة".

وأضافت: "الناس اللي شغالة في بنزينة، البنزين غلي على الناس كلها، زود في التيبس لأن دول بيجمعوا فلوسهم من التيبس ده، مش تقولي 2 جنيه، طلع ليهم أكتر لأن مرتبهم صغير، لما يروح العامل ده مبسوط حتى لو بـ50 جنيه هيجيب بيهم وهو مروح 2 كيلو برتقال أو كيلو بصل".

وعن تفاصيل دخولها الوسط الفني قالت إنه كان اختيار الله لها، مضيفة: "أنا مؤمنة جدًا بالكرامة، ودخولي الشغلانة كان صدفة جدًا وربنا هو اللي اختار ده ليا".

وتابعت صفاء: "أنا على طول بكلم ربنا سبحانه وتعالى، وعارفة إن ربنا على طول واقف جنبي، ودايمًا لو في مشاكل أو الدنيا بتضيق بيا بلجأ لربنا وبقوله يا رب حلها من عندك، اللهم دبر لي فإني لا أحسن التدبير، ودايمًا ربنا بيخرجني من كل حاجة وحشة، وأكتر وقت هو شهر رمضان لما كله بينام بقعد أتكلم مع ربنا وأطلب منه اللي نفسي فيه، إنه يحفظلي حياتي وولادي وأمي، أنا علاقتي بربنا علاقة قوية".

وأضافت: "حصلت حاجة شبه المعجزات، من حوالي 10 سنين كان داخل عليا رمضان وكنت مخلصة كل شغلي، وكل الفلوس قبضتها وصرفتها، وكنت قاعدة قبل رمضان، ومقدرتش أعمل شنط رمضان وكنت متضايقة جدًا".

وتابعت: "لقيت تليفون من حد قالي إن في حلقتين مكافأة ليا ورقم حلو وفي وقت صعب، والمسلسل كان خلص، وقولت أشكرك يا رب ولما بنعمل خير ربنا بيساعدك، إحنا اللي محتاجين نطلع صدقة مش الناس اللي محتاجاها، وأهم حاجة في الدنيا الستر والصحة، مهما كان معاك فلوس.