إشترك
في الجزء الثاني من حلقتها في برنامج "أسرار" الذي تقدّمه الإعلامية أميرة بدر عبر قناة "النهار"، قالت الفنانة لقاء الخميسي إنها تتحدث مع والدها المتوفّى معبّرةً عن اشتياقها الكبير له، وأكدت أنها دخلت قبر الفنان الراحل أحمد زكي خلال دفنه، كما تحدثت عن ضرب ابنها لها وخلافها مع الفنان خالد سليم بسبب ترتييب الأسماء على تتر مسلسل "أبواب الشك".
وقالت لقاء:
- "باكلّم والدي وبيردّ عليا، أنا باكلّمه في الكتابة عندي كشاكيل بكتب فيها، أنا بعرف أكتب ومفروض كنت أبقى مؤلفة، وبيبعتلي رسايل في علامات حواليا لأني بركز جداً في التفاصيل".
- "نزلت قبر أحمد زكي عشان بحبّه، وكنت حامل في ابني، ونزلت السلالم كلها وطلّعوني، وزوجي كان ماسك النعش معاهم، وبحبّه عشان بصدّقه ومن أهم الناس".
- "كنا صغيرين أنا وزميلي لؤي عمران، وقابلنا أحمد زكي في الأسانسير، قاللي إنتي ممثلة من غير ما يشوف لي حاجة ولا كنت عملت حاجة، وقاللي هتبقي موهوبة جداً، وقال لزميلي بردو".
- "قلت لأحمد زكي أنا بحبك ممكن آخد حضن، راح حاضنّي، وبعد وفاته مقدرتش أتفرج له على حاجة، وعمري ما نزلت القبر غير لأبويا".
- كان عندي خطيئة الغضب جامد أوي وأنا صغيرة، وابتدت تقلّ شوية، ودلوقتي بحاول أسيطر على نفسي، ومنذ سنة ونص بقول خدي نفس طويل، ولما بقيت ألعب رياضة الأمور بقت أفضل".
- "أكتر لحظات الغضب كانت مع ابني الكبير، هو أكتر واحد ممكن ينرفزني، واتنرفزت عليه أكتر من مرة، وساعات بكون مجنونة ومبحسش بنفسي وأحدف حاجات عليه".
- "ابني الكبير مد إيده عليا وقعدت أعيط ثلاثة أيام ومقدرتش عليه وصعبت عليا نفسي، وبعدها أوسة جاء واتكلّم معاه واعتذرلي وباس راسي".
- "محمد عبد المنصف عمره ما اتعامل معايا بشكل عنيف ومبيزعّقش، وده هينقطني وهيجيبلي جلطة أنا بس اللي صوتي عالي، ووجهة نظره منطقية إننا لما صوتنا يعلى ابننا مش هيقتنع فنتكلم بالهدوء".
- "عبد المنصف شخص متماسك ورزين أنا بقى شخص رومانسي وانفعالي وشاعري فكذا مرة أصرخ وأتجنّن وفي الآخر بنزل على مفيش".
- "مسلسل "أبواب الشك" كان حقي احط اسمي قبل خالد سليم، ومضيت من غير ما أعرف إن خالد سليم هو اللي رشّحني، وخالد سليم نجم كبير لكن بشوفه مطرب ومغنّي جامد، لكن أنا أصلي ممثلة".
- "الفرق بين خالد سليم وتامر حسني إنه اتعمله أفلام كتير لسنين، والخناقة غريبة لأنه على مين يمين ومين شمال، وخالد عشرة ومتجوز صاحبتي".
- "بقالي سنتين مريحة بفصل، ومش معناه إني مبحبش شغلي، شغلي في "راجل وست ستات" 11 موسم مش كسل، لكن أخدت رأي أقرب الناس ليا وقالولي كمّلي، لكني كنت ضد إني أعمل أكتر من ثلاثة مواسم، وشايفة إني آخد وش القفص وانطلق".
- "كبريائي ذكاء عشان مخسرش حاجات في شغلي واتضايق، ومخسرتش كتير، وبحب أشوف نفسي مهمة لأني فعلاً مهمة، مبطلبش كتير في الأعمال، ومبحبش حد يعتبرني مش موجودة".
- "أرفض الحرية الشخصية في ما يتعلق بتغيير الشخص هويته الجنسية، والتحوّل الجنسي من ذكر إلى أنثى أو العكس، إلا إذا كانت هناك مشكلة طبية معينة، وقتها يكون ده مقبول".
- "لو ابني قاللي أنا هساكن واحدة وأعيش معاها من غير جواز، هقوله طبعاً لأ، وده غير مقبول أبداً".
- "الحرية لها حدود، ولكن أقدر أسيطر على العائلة اللي معايا وأخلّي ابني يقرأ القرآن ويعرف الصح والغلط، إنما مقدرش أسيطر على تصرفات الآخرين".
