إشترك
خلال استضافتها في برنامج "أسرار" الذي تقدّمه الإعلامية أميرة بدر على قناة "النهار"، كشفت الفنانة لقاء الخميسي للمرة الأولى مفاجأة عن ديانة والدتها بعد الجدل الذي أُثير حولها خلال الفترة الماضية، وذلك بعد حديثها عن كونها مسلمة بالوراثة، حيث قالت:
- "أنا مسلمة، أبويا مسلم وأنا مسلمة، ومعنى كلمة مسلمة إني أسلمت قلبي لله، كل واحد جواه ربنا، شايف ربنا إزاي ومعتنق ديانة إيه دي تخص كل واحد متخصش حد تاني، وأنا شايفة أن كل الأديان بتعرف ربنا، ووالدتي مسيحية، وأمي عمرها ما دخّلتنا في القصة دي".
- "أمي مسيحية وكانت بتصوم معانا رمضان وتصحّينا نصلّي الفجر، هي بتصلّي لربنا بطريقتها وروحت معاها مرات كتير جداً الكنسية وصلّيت، وهي نفس الصلاة لكن الطقس مختلف، والمسلم زي المسيحي زي اليهودي، والناس مش شايفة كده وكل واحد عنده أفكاره، أنا قرأت في التاريخ والدين كتير أوي".
- "مفيش فروق بين الأديان هو نفس الكلام، إحنا محتاجين نعرف ربنا، إحنا جزء من ربنا، مش بيقولك ونفخنا فيه من روحنا؟ الطبيعي نطلع مسلمين يعني أسلمنا قلبنا لله، يبقى كلنا زي بعض".
- "الديانة الإبراهيمية هي الأساس لأن إبراهيم هو الأساس، والدين يتحدث عن الله واحد مفيش غيره والأديان مختلفوش، وقبل ما يبقى في إسلام في مصر كانت مسيحية وقبلها يهودية، دخل عمرو بن العاص بقت مصر مسلمة".
- "مبسمعش شيوخ بتتكلم عن الدين، ومبحبش أقول أنا مع مين وضد مين، ولكن بحب أسمع النقشبندي، أنا عشت في بلد مش محتاجة حد يشرحلي حاجة، ولما كنت في الإمارات التربية الدينية كان جزء من المناهج ومدرّسين الدين كانوا مصريين".
- "أنا بقرأ بس ومبسمعش لحد، سمعت كتير ولكن مش مقتنعة بكل الحاجات، في ناس دلوقتي لطيفة زي الشيخ مصطفى حسني مريح وهادي وواعي، ممكن أكون أنا مش محجبة لكن أنا بحبه، بيدّيني إحساس السلام النفسي، علاقتنا بربّنا مش خناقة".
- "في ناس بتضايق من آرائي وبيشتموني، لو أنت رافض فكرة تناقش أو تخطيها، والناس بتشتم تقول أنتي متعرفيش ربنا، هل هما عارفين حياتي؟ أنا بعمل إيه في بيتي أو بدعي ربنا بقول إيه؟ حد دخل جوايا أنا صادقة ولا لأ؟ ربنا الوحيد اللي عارف الصدق من عدمه".
- "علاقتي بربنا أحلى حاجة في الحياة، أنا راضية ومعايا زوج جميل راضي، وكل يوم الصبح بشكر ربنا على كل حاجة".
- "ممكن أكون أثّرت على زوجي محمد عبد المنصف في حاجة ولكن مش المسيّرة، ووقت ما اتجوزني الجماهير هاجمته إنه ليه ممثلة!".
- "زمان كانت وقتها فضيحة إنه يتجوز ممثلة، وأنا زوجي مأثرش فيا زي ما أنا أثرت فيه، ولادي اللي أثروا فيا جامد".
- "اللي جوزي رفضه أنا كمان كنت هرفضه، وأنا مش واخدة على المشاهد المنفتحة الزيادة، وفيلم "إحكي يا شهرزاد" اتعرض عليا دور المحامية اللي كانت قصاد أستاذ محمود حميدة، وكان في مشهد على السرير واللي رشحني أستاذ وحيد حامد الله يرحمه، وقابلته وقولتله مش هقدر أعمله علشان مشهد على السرير، قالي أنتي بتهزري أنتي بترفضي فيلم لوحيد حامد وأنا شايفك نجمة؟ قولتله لأ أنا مش برفض فيلم لو حضرتك شيلت المشهد ده همثّل، قالي مش أنتي اللي هتقولي لي أشيل إيه ومشيليش إيه".
- "لو كنت قبلت ده كان هيحصل لجوزي مشاكل، خاصة أن جمهور الزمالك كان بيشتم إنه اتجوز ممثلة".
- في أعمال مهمة جداً رفضتها وقعدت أعيط أسبوع في البيت بسبب مشاهد، ورفضت فيلم "سكوت هنصور" مع يوسف شاهين وكنت هموت، رفضت الفيلم بسبب مشهد بوسة، وروبي هي اللي عملت الدور".
- "لو رجع بيا الزمن ومفيش بوسة في الفيلم هقبله، وأنا مبقولش إن اللي هيعمل ده مش كويس، ولكن أنا مش هقدر، والفيلم التاني "إحكي يا شهرزاد" مشهد كان بالنسبة ليا تقيل أوي ووقتها كنت متجوزة، ولو المشهد ده كنت عملته محمد عبد المنصف كان هيقعد في البيت".
- "طبعاً بحب جوزي لغاية دلوقتي لأن هو راجل يتحب، مفيش حد معندوش عيوب ومكنش بيقعد معايا كتير ولكن هو راجل حنيّن وبيحب ولاده وأمي وإخواتي وكل الناس".
- "زوجي أنضف من إنه يتقفش، وأنا حسيت إن في حاجة حصلت وأنا مش هفتش وراه وأضايق نفسي ليه؟ ما كل حاجة هتعدي، ولكن أنا حسيت ومش عايزة أشوف إثبات، والست الناصحة متخربش على نفسها، وعملت مش واخدة بالي وعدّت...".
- "اتشتمت على المشهد بتاع الرقص في "الزوجة الرابعة"، ولما أنا بتشتم زوجي بيزعل، وده شغلي واللوكيشن مليان ناس وأنا أصلاً مبعرفش أرقص شرقي".
- "ابني مبيتفرجش عليا خالص ومحدش بيتفرج عليا، مبيتفرجوش على عربي أصلاً مع نفسهم في عالم موازي".
