بالفيديو - ريهام سعيد باكيةً تكشف آثار عمليات التجميل على وجهها

خلال تقديمها إحدى حلقات برنامجها "صبايا" عبر قناة "هي"، كشفت الإعلامية ريهام سعيد عن آثار عمليات التجميل الفاشلة التي خضعت لها وأثّرت في وجهها، حيث حرصت على الظهور من دون مكياج لتكشف تفاصيل ما حدث لها على يد طبيب التجميل اللبناني نادر صعب وتشوّه وجهها.

وقالت ريهام: "كل الناس لما كانت تشوفني كانت تقوللي مالك خاسّة ليه كدا... كنت بعيدة تماماً عن الناس وكنت علشان أنزل محتاجة أحط 13 كيلو مكياج وفي الاستوديو بنحط حاجة تدعم الوش وتخفي كل علامات الإجهاد ودي بفلوس كتير والقنوات بتأجّرها لي".

وأضافت: "ناس كتير أوي كانت عارفة إن حلمي التمثيل ومش الممثلة القديرة لكن كنت موجودة واشتغلت مع عمالقة وفي الدراما ميقدرش يمشي ورايا بفلتر ووقت ما حصللي كدا قولت خلاص ربنا مش عايزك تمثّلي، ولو حد عاوزني في عمل هيقوله دي اتشوّهت، كان في لحظات وحشة أوي".

ولم تتمالك ريهام سعيد نفسها وانخرطت في البكاء وهي تقول: "آخر مرة روحت للدكتور عمللي فيلر عشان في حفرة جامدة عندي، بس أنا هدوّب الفلير وهتعرض على الطب الشرعي وهيلاقي الحفرة دي".

واستعرضت ريهام سعيد آثار عملية التجميل التي خضعت لها على يد الطبيب اللبناني فقالت: "عندي حفرة كبيرة تحت عيني وعيني بترمش كل 5 ثواني ومش بعرف أتكلم أوي عشان بقى مشدود زيادة عن اللزوم، في ناس كتير بتقول تستاهل عشان بتغير خلقة ربنا.. أنا عملت عملية تجميل عشان بحارب السنّ بس النتيجة كانت صادمة، أنا مكنتش هقول إني اتشوّهت، مش حلو إن جمهوري يعرف إني اتشوّهت، كنت بطلّ على الهوا لابسة نضّارة فاضية عشان تداري الحفر اللي في وشّي اللي بانت كأني واخدة بشلة في كل حتة فيه كأني كنت في خناقة".

وأردفت بالقول: "شكلي مش أنا، في حتت بروحها بيقولولي اسمك إيه؟ بقالي عشرة شهور بلبس نضّارات فاضية، ولو ملقتش نضّارة في شنطتي بعيّط ومنزلش من عربيتي... هروح أرمي كل النضّارات دي خلاص، مهو حمل وانزاح من هنا ورايح هتأقلم على شكلي الجديد والكل هيتأقلم بشكر كل واحد بيدمّرني نفسياً أكتر... مكنتش قادرة أطلع هوا النهاردة، بس طلعت احتراماً ليكم عشان قولتلكم هطلع لجمهوري عشان محدّش يقلق عليا، الناس كانت متخيّلة إني هطلّع حاجات دا مش مكانه خالص أنا هرفع قضايا في مصر والعراق والإمارات وهتتضمن تشهير وسبّ وقذف وخروج عن المعايير الطبية".

واختتمت ريهام سعيد حديثها مؤكدةً: "طول ما أنا حية أُرزق، هافضل باحثة عن حقي وهرجّعه. أنا ست لوحدي مليش حد خالص بس أنا هاخد حقي، كل ما بيتغلط فيّ بيكون في ميزان حسناتي... عمليات التجميل مش حاجة وحشة، وشّنا رأس مالنا... بالبلدي أكل عيشنا بنعتمد عليه في كل حاجة، مينفعش ممثلة أو مذيعة مش حلوة أو باينة إنها كبيرة في السنّ، لأن أنتم كمان مبترحموش، أنا مش هصلّح اللي حصل فيّ إلا لما أتعرض على الطب الشرعي، وأنا عندي ثقة رهيبة في القضاء وربّنا".