رسالة طويلة من تامر حسني يحضّ فيها متابعيه على هذا الأمر

نشر الفنان تامر حسني من خلال حسابه الخاص في "إنستغرام" رسالة طويلة وجّهها إلى متابعيه يحثّهم فيها على أداء الصلاة في مواعيدها، مشيراً إلى أنه لا يحدّثهم من منطق الشيخ أو منطق الفنان، بل من منطق الإنسان، مؤكداً أنه لم يكن يؤدي الصلاة في مواعيدها إلى أن هداه الله إلى ذلك.

وقال تامر حسني في منشوره: "أنت مش منافق أنت مجاهد... بوست طويل بس اللي هيقرأه للآخر هيكون محتاجه جداً والله العظيم... بخصوص الصلاة هحكي حاجة حصلت معايا حبيت أشارككم بيها للي يهمه الأمر... فيه أكيد فيكم مش بيصلّي أو بيقطع في الصلاة اللي بيقطع في الصلاة عايز أقول... أفضل قاوم شيطانك لحد ما تنتصر ده حصل معايا شخصياً أواظب وأقطع 100 مرة لحد ما استقريت... أخد وقت ثوابك هيكون أكبر لأنك بتجاهد نفسك وشيطانك عشان خاطر ربنا... فيه نوع تاني اللي بيقول هبدأ من بكرا وميقدرش ويقول معلش بكرا وميقدرش تالت وميقدرش عاشر أحب أقوله حتى لو عزمت النيه 1000 مرة ومش بتنفذ... ربنا بيفضل مستنيك بمنتهى الحب لأنه شايف مجهود نيتك في الأسرار على الرغبة حتى لو مش قادر تنفذ هيجازيك خير برضو على رغبتك حتى لو منفذتش لسه وهيبقى مستنيك تاخد القرار وفاتحلك إيده بكل حب عشان تنطلق وتدخل في رحمته وفي معيته".

وأضاف: "في الوقت ده بيبقى حواليك ناس يا بيشجعوك ودول ناس تمسك فيهم يا ناس مش بتصلي ياريت تبعد عنهم هما مش عايزينك تصلّي غيرة منك لأنهم من جواهم مقتنعين بربنا بس بيكابروا فبيزعلوا عشان متبقاش أعلى منهم عند ربنا حتى لو في شيء من الذنوب بتعملها عادي كلنا خطائين أوعى تخليهم يقولولك يا عم أنت بتعمل ذنب كذا وكذا إزاي تصلّي يا منافق لا... وألف لا أنت مش منافق أنت مجاهد لنفسك ولشيطانك يعني في تحدي أكبر ثوابه أكبر بكتير عشان بقى خاطر ربنا غالي عندك وبتعمل اللي هو عايزه إنك تصلي وكل ما تغلط تروحله هو بيحب كده وهيسامحك عادي... ولو غلط وروحتله 1000 مرة المهم إن كل مره يبقى عندك نية الارتقاء بنفسك معاه وتتصدق كتير صدقوني في قوة خارقة في تأثير الصدقة وفي كل ذنب عليكم بالناس البسطاء فرحوهم أوي".

وأردف: "ربنا هيفرحك أوي أوي... أنا مش شيخ يا جماعة ومش بتكلم كفنان لا أنا بتكلم كإنسان أنا بقالي سنين يمكن من أكتر الناس اللي بتقرأ في العالم في كل الاتجاهات أنا فعلاً بصحى من النوم بثقف نفسي وكل حرف بعرفه وكل معنى جميل أعرفه بحب أوصله ليكم دي إنسانيات عشان إحنا كبشر أخوات لازم نقوّي بعض... المهم الناس لازم تفرق بين معاملة البشر للبشر ومعاملة ربنا للبشر... يعني البشر لو مسألتش فيه يومين هو مش هيسأل فيك 10 وهيردهالك بس ربنا مش كده أوعوا تشوفوا ربنا بيعاملنا كده... ربنا يعني الرحمة كلها بالعكس بيفضل يناديلك كل يوم 5 مرات ولسنوات وأنت مش بترد وبيقولك أنا أكبر من اللي بتعمله تعالى أصلحلك روحك وأشوف احتياجاتك وأشفيك وأريح قلبك وأنت بتهمله ومش مرة لا سنين كتير وكل يوم 5 مرات ينادي بعظمته وجلاله وأنت برضو مش بترد ونسمعه بيقول في الأذان الله أكبر يعني يا فلان مهما كنت بتعمل إيه... أنا أكبر وأهم... تعالى خد مصلحتك واعمل لروحك صيانة ومش ببلاش لا ده ربنا ساعتها بيكتبلك ملايين النجاحات والأموال والرحمات وإسقاط الذنوب ويفديك ويشفيك وينوّر بصيرتك كفاية اسمك هيبقى مع الناس اللي مكرمهم تحت معيته وحمايته".

واستكمل تامر حديثه قائلاً: "وأنت برضو مش بتروح ومش مقدّر النعمة دي جرّب تفهم وتحس إن لمّا نسمع أذان بيقول الله أكبر جرب إنك تفهم المعنى إن الله أكبر من اللي بتعمله دلوقتي حالاً وإن ربنا مستنيك تطلب منه عشان يرضيك ويشيل ذنوبك ومهما كنت بتغلط وترجع تصلي عادي دا أصلاً لازم عشان تمسح الذنب اللي فات... الصلاة والصدقة بيمحوا السيئة والصدقة بتطفئ غضب الرب يعني هتنضف وتمسح في مشوارك مع ربنا غلطة غلطة وكمان هيبدلهم ليك حسنات في أحلى من كده بالذمة !!!؟؟؟ وممكن في دعوة صادقة يمحوا ربنا كل ذنوب عمرك تخيلوا بقى... ده لو ميتنغ مع مديرك وعارفين إنه هيهزئنا بنروح جري طب تخيلوا مقابلة ربنا لدقايق بيرحمنا فيها ويسمع طلباتنا وعايزين إيه ويحقق لنا أمنيات حلوة بمواعيده هو لعلمه المسبق بمصلحتنا وفي أمنيات بتتحقق فوراً لأنها لمصلحتنا في الفور وكمان يشيل ذنوبنا... معقول نسيب الميتنغ ده... هو إحنا يعني عشان مش بنشوف النتيجة ساعتها!!! اطمنوا هو الحق والصدق ثقوا في كل كلمة وكل وعد وعد بيه... يا جماعة في الآخرة ربنا مش بس هيورينا أعمالنا لا هيورينا كمان هو شال من علينا إيه وفدانا بإيه هتعرفوا بقى قيمة الحماية اللي ربنا كان عاملهالك بسبب صلاتك ورحمته هتبكي فرحاً من صدمة اللي هنشوفه".

واستطرد موضحاً: "وعلى فكرة حتى اللي مش بيصلّوا هما برضو في رحمته وبيرزقهم أملاً في إن يرجعوله ده هو اللي خالقهم وبرضو بيرحمهم لأنه رحيم بكل عباده بس اللي بيصلوا ويتصدقوا دول في معزّة أخرى خالص وياما شوفنا ناس بتحارب الصلاة ودلوقتي بيصلّوا وبقوا حاجة رائعة ناس بيشتغلوا ووسطيين عارفين يعيشوها صح بين الدنيا والآخرة... اوعوا تحسوا إن عشان في ناس في الزمن ده اتغيروا وبقوا بعيد أوي عن فكرة ربنا أصلاً وممكن يتريقوا عليك لو صليت أو صومت... الموضوع ده يخليك لازم تصلّي أكتر من الأول عشان ثوابك بقى أكبر بكتير لأنك تحولت من مجاهد لنفسك لمدافع عن ربنا بتدافع عنه بقوة قدّام ناس ده أنت كده كمان بقيت جندي من جنوده بتحارب عشانه ويا بخت اللي ربنا بيستخدمه وكمان لو ربنا هداهم بسببك شوف بقى هتقش حسنات قد إيه يابن المحظوظة".

واختتم تامر حسني منشوره قائلاً: "هو دا صراع الدنيا هنآمن بربنا من غير ما نشوفه وهنعمل بالكنز اللي في القرآن أقسم بالله أقسم بالله أقسم بالله اللي عنده مصحف في بيته هو عنده الجنة ومش فاهمها عنده دليل واضح جواه أغلى من الكنز خصص في اللايف ستايل عندك مهما كنت بتغلط عادي ربنا تواب وأفضل قلل من ذنوبك أفضل قللها واحدة واحدة ده اسمه جهاد مع النفس يعني شيء عظيم ربنا شاهد على مجهودك فيه حتى لو روحت وجيت وروحت وجيت كل دي محاولات ربّنا يحبك أكتر عشانها وهتكسب في الآخر إن شاء الله... ربنا وصلاته والصدقة وبر الوالدين... وشغلك. وأصحابك... اهتم بكل دول اليوم طويل 24 ساعة عيشهم صح يا صاحبي عادي والله في وقت ونص لكل دول".

مقالات ذات صلة

ممثل عالمي يعلن إصابته بالسرطان برسالة مؤثرة

بالفيديو - أسماء جلال تكشف مفاجأة عن "الفستان الأبيض"

تامر حسني نجوم الفن مشاهير الفن نجوم مصر الصلاة