طليق بوسي يكشف تفاصيل طلاقهما: دخلت بسببها السجن

20 تشرين الثاني 2023 | القاهرة – "لها"

بوسي وهشام ربيع

بعد أيام قليلة على إعلان رجل الأعمال هشام ربيع، انفصاله رسمياً عن المطربة بوسي، كشف تفاصيل وأسباب اتخاذه قرار الطلاق.

وقال طليق بوسي إنه دخل السجن بسببها وخسر 21 مليون جنيه، حيث سُجن أربعة أشهر بتهمة الاستيلاء على شيكات بمبلغ ثمانية ملايين جنيه من طليقها الأول المنتج الراحل وليد فطين، ولكنه حصل أخيراً على حكم براءة من التهمة، وبمجرد خروجه من السجن أعلن طلاقه لها.

وقال هشام ربيع: "دخلت بسببها السجن لأن كان عليها شيكات دفعت عشانها 21 مليون جنيه وربنا يسامحها، مش عاوز منها حاجة غير إنها تبعد عني، عاوز أشوف شغلي، وببني مول جديد ولكن محدّش رفع سماعة تليفون عليا يشتري أو يأجر بسبب الشائعات لأنها أذتني في شركات المولات اللي بملايين الجنيهات".

وأشار هشام ربيع إلى أنه كان حريصاً على أن يرسل لوالد بوسي الراحل مرتّباً شهرياً من دون علمها، قائلاً: "محدّش بيشكر في نفسه، لكن ربّنا بيظهر الحق وربّنا يعلم إني كنت ببعت لأبوها مرتب شهري وبقول له بوسي اللي بعتاه وبطلب منه يدعي لها، علّمتها تدفع صدقات تعليم للأيتام بإحدى الجمعيات وقلت لها دول كام سنة عايشينهم وفي النهاية هنقابل ربنا والآخرة أوسع، دوّري على الآخرة مش الدنيا".

وأضاف: "الله يسهّلها مش عاوز منها حاجة ولا الفلوس اللي اتصرفت مش بتفرق معايا الفلوس وبعتبرهم صدقة من ضمن الصدقات أو عربية واتخبطت والحمد لله الواحد رجع لبيته ولمراته اللي كنت مقصّر معاهم ومش حاسس بالتقصير ده من ناحيتهم".

وفي ختام حديثه، وجّه هشام ربيع نصيحة الى الجمهور من خلال تجربته بعد الانفصال عن بوسي، بعدم التسرّع في اتخاذ خطوة الزواج إلا بعد فترة خطوبة لا تقل عن ستة أشهر، قائلاً: "غلطتي إني اتسرّعت واتجوزتها بعد شهر واحد من الخطوبة، والتسرّع حاجة غلط وفترة الخطوبة ما ينفعش تكون شهر واحد، لازم نتعلم، هو في حد يخطب واحدة شهر؟ ده جنان".

وأضاف: "أنا معروف عني إني شاطر وشركاتي ناجحة وبكسب من الهواء لكني طلعت خايب في الحتة دي، ومحدّش يخطب شهر، ده مشروع فاشل أقل حاجة تقعد ستة شهور أو سنة تدرس والعشرة بتبين والمواقف بتبين ما تعملش نفسك ناصح وبتفهم الناس من عينيها".