بالفيديو - مدير أعمال تامر حسني ينجو من الموت ويروي ما حصل معه

أعلن تامر يحيى مدير أعمال الفنان تامر حسني على حسابه الخاص بـ"فيسبوك" تعرضه لحادث مروع بطريق العلمين، ونجاته بأعجوبة من الموت.

ونشر تامر مجموعة فيديوهات وصور من الحادث أظهر تحطم سيارته بشكل كامل، وكتب معلقاً على الصور والفيديوهات: "مافيش كلام ينفع يتقال غير الحمد لله وبشكرك يا رب على كل حال وفي كل حال ومن أجل كل حال وعلى كل تجربة صعبة أنت بتحطني فيها علشان تفكرني دائمًا بوجودك في حياتي، وبتكون رسالة سواء أنت بتحبني وبتفديني من حاجة أكبر كان ممكن تحصل ليا أو لحد غالي عندي أو بتكون عايز تفكرني إن فيه خطأ في حياتي محتاج أنتبه ليه وأصلحه والحمد لله أنا عندي إيمان شديد بتجارب ربنا ونعمه الكبيرة في حياتي".

وأضاف: "أنا ومحمد السواق الجميل اللي معايا ربنا نجانا من الموت إمبارح في حادثة من أكبر الحوادث اللي عملتها في حياتي وإحنا راجعين من العلمين الساعة 1:30 ظهرا فجأة ظهرت عربية نقل قدامه واقفة في نص طريق وادي النطرون في الحارة الثالثة وهو كان قبلها بثواني بيحاول يشغل حاجة في الشاشة اللي قدامه فمكانش في كامل تركيزه على الطريق وما قدرش يتفاداها".

وتابع: "العربية هربت من موقع الحادث بسرعة علشان عارف طبعا إنه غلطان وأنا ومحمد ما قدرناش ننزل من العربية غير بعد تقريبا ربع ساعة علشان الدم كان مغرق العربية والمشكلة اللي عقلي مش قادر يستوعبها إنه إزاي مافيش ولا air bag فتحت؟ أنا مش هقدر أعدي الموضوع ده من غير ما ألاقي إجابة فنية ليه لأني لو عرفت إنه ده خطأ فني في اللي برمج السوفت وير أو ركب السينسورز أنا مش هسيبه إلا لما أسجنه لأنه كان حياتي هتنتهي أو أعيش بتشوهات في وشي طول عمري بسبب عدم فتح أي air bag".

وواصل تامر يحيى: "أنا حصل لي نزيف جامد بسبب كسر في مناخيري وقطع أخذ 8 غرز وقطع داخل الفم أخذ 3 غرز وشرخ في الساق وغالبا هعمل عملية في مناخيري بعد 5 أيام، محمد السائق الحمد لله كان حاطط حزام الأمان فربنا أنقذه وكل اللي فيه مجموعة كدمات، والنقل هرب من موقع الحادث وأنا طلبت النجدة الإسعاف 17 مرة لكن للأسف كل مرة يردوا طالبين مني تحديد موقعي أو أي علامة مميزة في الصحراء وفي طريق صحراوي ودي يعني خليتني أتعصب عليهم لكن مافيش أي حاجه نفعت معاهم".

واستكمل مدير أعمال تامر حسني: "طلبت من كل اللي كلموني من النجدة إن حد يبعت لي أي رقم تليفون أبعت له عليه لوكيشن وإني بنزف نزيف جامد ومحتاج إسعاف فورًا لكن كان الرد في كل مرة لا يا فندم ده مش أوبشن عندنا وقعدت ساعة ونص تقريبا بدون مساعدة، ساعة ونصف وأنا بنزف في طريق دولي عدى عليا حوالي أكتر من 500 عربية لكن للأسف ولا عربية فكرت تقف تشوف فيه إيه وغاليا من بشاعة منظر عربيتي الناس افتكرت اني اللي جواها أكيد ماتوا لأنه طبيعي لو أي عربية تانية مش بقوه Range Rover كان استحالة نحرج منها عايشين".

وأردف تامر يحيى: آه على فكرة الحادثة كانت الساعة 1:30 الظهر وبعد ما روحت المستشفى في وادي النطرون وبعدها مستشفى زايد التخصصي وبعدها مستشفى الرفيدة وخلصت كل حاجة وعدت 8 ساعات لقيت تليفون من النجدة بتاعت طريق العلمين الساعة 9:30 مساء بيقولي هو حضرتك عملت بلاغ عن حادثة من ساعة في طريق العلمين ؟ طبعا لقيت نفسي بمنتهي الاحترام بضحك وبقفل السكة في وشه، المفروض إنه كان عندي رحلة لأمريكا النهاردة لكن طبعا مش هقدر أسافر لمدة 10 أيام ولغيت كل حاجة وكل الحجوزات والطيران والفنادق وكل حاجة وتم تأجيل كل حاجة لكن برضه الحمد لله".

وواصل: "العربية دي من يوم ما اشتريتها وأنا شايف حاجات بتحصلي فيها عمري ماشوفتها في 27 سنة شغل وركوب عربيات، والساحل خلص واللي شايف حياتنا على السوشيال ميديا بس ياريت ييجي يقضي معانا أسبوع بس ويشوف حجم الشغل اللي بنشتغله كل يوم وحجم الضغط النفسي والعصبي اللي إحنا عايشين فيه واللي مافيش حد يقدر عليه أو يقدر يستحمله وأن الخروج والسهر والسفر والظهور في المجتمعات والحفلات والسفر الكتير والصور والفيديوهات اللي بتشوفوها وغيره وغيره ده جزء من شغلنا وجزء من حياتنا وجزء صعب قوي قوي قوي وليه ضريبة جامدة قوي بندفعها للأسف من وقتنا وفلوسنا وصحتنا وأحيانًا عائلاتنا علشان دي طبيعة شغلنا للأسف اللي بناكل منها عيش مش أكتر.

واختتم مدير أعمال تامر حسني: "الحمد لله علي كل شيء ويارب ما يوري حد منكم أو حد غالي عليكم اللي أنا شوفته النهارده.، شكراً لكل أصحابي اللي وقفوا معايا وساعدوني واهتموا إنهم ينقلوني أفضل مستشفيات علشان آخد أحسن رعاية وغرز تجميل واتطمن علي نفسي.، شكرًا هاني هانز وضياء سليمان ودكتور محمود السيد ودكتور احمد نجم وكل تيم مستشفى الرفيدة علي كل حاجة، شكراً إخواتي تامر حسني وحسام حسني ورومير على الاهتمام ومتابعة حالتي طول اليوم، وشكراً عماد نبيل بجد أنت أخ حقيقي على كل اللي عملته معايا النهاردة وخلي بالك من العربية بقى لحد ما تروح لحال سبيلها أو نبيعها خردة علشان أنا مش هركبها تاني وربنا يعوض عليا ويبعد عننا كلنا العين الشريرة، تاني أنا كويس الحمد لله بس معلش تليفوني قافله كام يوم محتاج فيهم راحة وهدوء.

مقالات ذات صلة

بالفيديو - ياسمين رئيس تدشن حملة "فستانك يفرح غيرك"

عمرو سعد يتحدى: لا يمكن لأحد أن يقدم أدواري

تامر حسني مدير أعمال الفنانين مشاهير الفن نجوم مصر حادث سير