إشترك
بعد إعلان خبر طلاق الفنان أحمد سعد من زوجته الرابعة مصمّمة الأزياء علياء بسيوني، علّق عدد من الإعلاميين في برامجهم على كثرة زواج وطلاق أحمد سعد في سنوات قليلة، ووصلت تعليقات البعض إلى حد السخرية منه.
الإعلامية بسمة وهبة وجّهت نصيحة لأحمد سعد، بعد إعلان علياء بسيوني طلاقهما، وقالت خلال تقديمها برنامج "90 دقيقة" عبر قناة "المحور": "فوجئنا النهاردة ببوست نازل من علياء زوجة المطرب أحمد سعد، وهو بوست قاسي جداً وواضح إن علياء كانت موجوعة جداً. الست ما تعملش كده إلا إذا حد جاب ولاّعة وولّع لها في حتة من جسمها أو قلبها".
وأضافت: "عايزة أنصحك يا أحمد نصيحة اعتبرها نصيحة إعلامية وأخت وتقدير، الشهرة والنجومية والفلوس لازم تغيّر البني آدم وتزغلل عينيه، وأوقات ربنا يديها للبني آدم اختبار أو مكافأة للست اللي معاه وبناتك، إنت طول عمرك من أجمل الأصوات، لكن ماكنتش بنجومية وشهرة النهاردة. نصيحتي لكل راجل عنده واحدة ست وقفت جنبه إوعى لما تعلا تدّيها كتف ربنا مش هيكرمك، وياما مطربين كانوا فوق في السما ودلوقتي في الأرض علشان افتروا على زوجاتهم".
واختتمت بسمة وهبي بالقول: "علياء ساعدتك ووقفت جنبك كتير يا أحمد، خلّي بالك وما تجيش على ستات مصر دول محميين بآل البيت، وأتمنى أحمد وعليا يكونوا رجعوا لبعض والشيطان اللي بينهم مشي".
فيما سخر الإعلامي تامر أمين من كثرة زيجات أحمد سعد وطلاقاته، خلال تقديمه برنامج "آخر النهار" عبر قناة النهار قائلاً: "زيجات وطلاقات وخناقات أحمد سعد الزوجية أكثر من أغنياته، ما بين أغنية وأغنية في جوازة أو طلاقة أو خناقة في النص، وهو طالع في برنامج يشتم طليقته، وطليقته ترجع ترد عليه وتشتمه... أحمد سعد عارف إني بحبه جداً، وكنت من أكثر المذيعين اللي شجعوه في بدايته، وربنا كرمه من وسع، لكن عايزه يهدا شوية في موضوع الجوازات يا أبو حميد".
وأضاف ساخراً: "واحدة واحدة يا ابني إنت لسه صغير وبسم الله ما شاء الله فرمت أربعة، إيه هتكمل الدستة؟!".
