إشترك
خلال حوارها في برنامج "المنسي"، الذي تقدّمه الإعلامية إنجي هشام على قناة "هي"، كشفت الفنانة ايناس مكي العديد من أسرارها الشخصية حيث تحدثت عن أسباب طلاقها بعد ستة أشهر فقط من الزواج، ورفضها العديد من الأدوار المهمة في حياتها المهنية.
وحول أسباب اعتذارها عن فيلم "مواطن ومخبر وحرامي"، قالت مكي: "جالي دور بطولة في فيلم "مواطن ومخبر وحرامي" ومرفضتوش عشان دا، المخرج داوود عبدالسيد دا مخرج كبير، روحت صوّرت بروفات لمدة شهرين وكانت البطلة حنان ترك مش هند صبري وكان دوري ٣٢ مشهد منها ٨ مشاهد هو اللي كاتبهم مشاهد حميمية".
وأضافت: "كان دور بنت متحررة اسمها مديحة وروحت للأستاذ داوود قلت له عاوزة أتكلم مع حضرتك فهّمني المشاهد دي هتتعمل إزاي لأني مش هعرف أعمل المشاهد، ساعتها اتكلمت بمنتهى الأوبن مايند وقلت له كل ما يخدم الدور هنصوّره بصللي وقام راح الفيلم".
وعن رأيها في مصطلح السينما النظيفة، قالت: "أنا ضد تصنيف مصطلح السينما النظيفة لأنه مستفز زي ما أقولك دي ترابيزة نضيفة ودي مش نضيفة، مع إننا نخدم على الدور كما يجب مش لازم نعمل مشاهد إحنا كأسرة نتكسف منها، وزوايا السينما نقدر نصوّر منها كل حاجة".
أما عن ابتعاد الفنانة عبلة كامل ورفضها الدائم للتكريمات خلال السنوات الماضية، فقالت إيناس مكي: "عبلة كامل من الشخصيات الجميلة اللي تعشق... في العشرة الأخت الطيبة الجدعة أنا مش مندهشة من موقفها وعلى مدار السنين اللي فاتت لو قلتيلي إنها قفلت التليفون ومبقتش بترد على الناس مش هستغرب أنا اطمنت عليها من حبي فيها وعرفت إن هي مش مبيجلهاش أدوار هي عاملة ستوب".
وأردفت بالقول: "كنت بردّ على الناس وأقولهم إحنا ستات في النهاية عادي مانا جالي قفلة وقعدت سبع سنين مش بشتغل ومش عايزة أرد على الوسط... السبع سنين دول كانوا كرم من عند ربنا إني آخد بالي من أمي، وكان ربنا هو اللي بيستف الأوراق وطلعت عايزة قلب مفتوح ودا عايز حد مركّز وخدت أمي لأخويا الكبير في فرنسا خلصنا العملية ورجعنا ولما بسرح بقول سبحانك يارب أنا لو كنت بشتغل مكنتش هاخد بالي".
وقالت الفنانة إيناس مكي إنها انفصلت عن زوجها بعد زواج دام ستة أشهر، معلّلةً السبب بأنها لم تكن مرتاحة في الزواج، ومشيرةً إلى أن المودة لا تزال موجودة بينها وبين طليقها حتى الآن.
وأضافت: "لما اتجوزت كان عندي ٢٩ سنة، وحياتي واضحة ومتظبطة وكنت نجمة ومكنتش متخيلة إنها تفشل قعدنا ست شهور مع العلم إنه ابن ناس ومحترم وسأل عليا بعد ١٥ سنة يطمن عليا وفي بينا مودة... لقيت نفسي بمنتهى الأدب والذوق بديلوا كل حاجته وبقولوا خلينا صحاب وسيبني في حالي يمكن أنا عصبية شوية يمكن أنا اللي مبستحملش يمكن الغلط فيا بس مكنتش مستريحة وعمري ما هسيب نفسي في حاجه مش مستريحة فيها... موضوع الزواج دلوقت اتقفل وكل ما حد ينكش في الموضوع وافتح الباب ألاقي استفزاز وهي هي نفس الطريقة، أنا حزينة إن نسبة كبيرة من صحباتي اللي أعرفهم بعد سنين طويلة برضوا بيطلقوا".
وعن سبب رفضها العديد من الأدوار بعد نجاحها في مسلسل "لن اعيش في جلباب أبي"، قالت مكي: "كنت ١٩ سنة ساعة ما عملته، ومكنتش متوقعة النجاح لأني كنت لسة وجه جديد وساعتها كنت بعمل برنامج "ناس وناس" وكنت عاملة شخصية مذيعة لاسعة والمخرج أحمد توفيق كان بيدوّر على حد يعمل "روزالين" فشاف الكراكتر واقترح على الفنان نور الشريف".
وتابعت: "قابلته وخدت الورق وصوّرنا أول يوم وتاني يوم ومكنتش أعرف إنه مبيحبش يتفرج على المونتور، فجأة تالت يوم تصوير حد من عمال البوفيه اتأثر بطريقة كلامي وبعدها لقيت الأستاذ نور رايح يتفرج على المشهد اللي بيني وبينه لقيت المخرجة رباب حسين بتقولي عارفة يعني إيه أستاذ نور يتفرج المونتور؟".
واختمت إيناس مكي حديثها قائلةً: "بعد ما اتفرج على المشهد قعد يقولّي برافو وكنت في قمه السعادة وبسبب نجاح الدور قعدت أربع سنين كل أدوار الخواجاية اللي في السوق كانت بتتعرض عليا وكنت باعتذر".
