بالفيديو - ياسر فرج يكشف أسباب غيابه عن الفن ورفضه العمل مع أمير كرارة

03 تموز 2023 | القاهرة – "لها"

ياسر فرج

حل الفنان ياسر فرج ضيفاً على الإعلامية إنجي هشام في برنامجها "المنسي" الذي تقدمه عبر قناة هي، حيث كشف عن سبب اختفائه عن الوسط الفني، والأسباب التي دعته لرفض العمل مع الفنان أمير كرارة في عمل درامي.

وأكد ياسر أنه ابتعد لمدة أربع سنوات بسبب وفاة زوجته، قائلاً: "كنت ماشي كويس جدًّا في الشغل لحد 2017، ولكن مريت بظرف شخصي عائلي قوي اضطرني إني أتخلى عن حاجات كتير في سبيل الأسرة وقعدت من آخر 2017 وتوقفت لحد 2021".

وتابع: "مراتي الله يرحمها توفيت وتعبت تعب شديد وكان لازم أكون موجود ومكنش عندي فرصة أعمل حاجه تانية".

واضاف: "لحد دلوقتي مش عارف مريت إزاي بالأزمة لما بفكر الوقت ده عدى إزاي وإزاي ربنا حط فيا القوة إني أتعامل مع الوضع معرفش، كان وقت صعب لكن الحمدلله الأمور بتهدى شوية".

وعن رأيه في النجوم الذين يتحكمون في الترشيحات بأعمالهم قال: "النجم وارد يقول للمخرج شايف فلان في الدور ده، لكن المخرج أو المنتج ليهم الحق في إنهم يقبلوا الترشيح أو لأ".

وتابع: "مصادفتش إن فنان رفض ترشيحي، مصادفتش موقف زي ده، بس صادفت العكس وبعض الزملاء من ضمنهم أمير كرارة وهو من النجوم المحترمين وصديق عزيز، كان حابب أكون معاه في عمل، لكن الأمور مظبطتش ومقدرتش للأسف أشارك لكن أتمنى أكون مع أمير كرارة وهو من الناس العزيزة على قلبي".

وأوضح قائلاً: "أنا معنديش مشكلة مشتغلش تاني لكن عندي مشكلة إني أعمل حاجة وأنا متضايق مش هعرف أشتغلها حتى لو زميل عزيز زي كرارة، أنا بشكره إنه فكر فيا لكن حسيت إن الدور مفيهوش إمكانيات".

وحول ندمه على مشاركته في فيلم "عايشين اللحظة" قال: "لأنه متنفذش زي ما كنت فاهم، ساعات العمل بيكون كويس لكن لما ندخل في مرحلة التنفيذ الأمور بتتغير وده اللي حصل في الفيلم".