إشترك
حلت الفنانة غادة إبراهيم ضيفة على الإعلامي العراقي نزار الفارس في برنامجه "تابوو" الذي يقدمه على قناة دجلة العراقية، حيث كشفت عن العديد من أسرار حياتها الشخصية والفنية وأسباب طلاقها من زوجها، مؤكدة أنها كانت حريصة على رضاه، مشيرة إلى أن رضا الزوج من رضا الرب.
وقالت غادة: "لما جوزي اتجوزني قال لي حبيبتي أنا وضعي حساس مفيش بوس لزمايلك ولا لبس أوفر، قلت له طبعًا يا حبيبي أنا يهمني أرضيك لأن رضا الزوج من رضا الرب، وجم زمايلي يسلموا عليا قلت لهم عندي برد وواحد تنمر عليا وقال لي يعني أنت دلوقتي مش بتبوسي، وبعد ما انفصلنا رجعت تاني، لأن أنا يهمني رضا رجلي".
وعن سبب إثارتها للجدل قالت: "الكايرزما من عند ربنا، وأنا مثيرة للجدل من عند ربنا، لأن في ناس حطاني في دماغها وناس حباني والناس عاوزة تعرف غادة فين وبتعمل إيه لأني عندي مصداقية وصراحة مش فايك واللي في قلبي بقوله".
وأضافت: "بقالي 20 سنة في الوسط محدش سمع عني والتنمر حصل في السنوات الأخيرة لأن نجمي طلع وبقيت لذيذة وبطلع في المهرجانات وبعمل أعمال عربية داخل وخارج مصر وفي نفسنة، وفي حيزبونات ومنفسنين، وعندي أعداء من الوسط الفني والإعلامي ومن كل حتة".
وعن سبب غيرة البعض منها قالت غادة: "لما اتعزم في مهرجان وأمشي على الريد كاربت بتاريخي الصغير، وواحدة نجمة سوبر ستار بقى لها 40 سنة في الفن، تدخل على الريد كارب بأردافها وباللغد مش بتصرف نقطة بوتوكس فاكرة إن تاريخها هيشفع ليها، ولو عندي ربع الملايين اللي عند النجمة دي هكون أحلى من هيفا وأكيد مش هسيب نفسي كده، وأنا ضد أغيّر في خلقتي، لكن بوتكس كل ستة شهور علشان شكلي يكون لذيذ لأن ده راس مالي".
علقت غادة، على إطلالة أحمد سعد المثيرة للجدل في حفله بجدة، وأكدت أنها لن تقبل أن يرتدي زوجها مثل هذه الملابس، قائلة: "مبحبش الراجل اللي بيلبس زي أحمد سعد في حفلة جدة، هو مش هينقص من رجولته، بس هيتفهم غلط، أحمد راجل أوي وصعيدي، بس اتصدمت لما لقيته لابس كده".
وأضافت: "مقبلش طبعا إن راجلي يلبس اللبس ده، أو يلبس حلق زي أحمد سعد، لو هو لبس كدة أومال أنا ألبس إيه؟، ومع ذلك أنا من عشاق أحمد سعد، بس معرفش ليه لبس كده".
وعن وجود الرجل في حياتها قالت إنه يمثل لها وسيلة وشكلا اجتماعيا، إلى جانب أنها تحتاجه في حياتها كونه يمثل لها العواطف والمشاعر والحب: "الراجل بالنسبة لي وسيلة وشكل اجتماعي وسفر وصرف وفلوس وبيت واحتياج، ومن ناحية أخرى عواطف وحب ومشاعر وسند وضهر واحتواء".
وأضافت: أنا محتاجة الرجل في حياتي ولكن الرجالة الحقيقيين يتعدوا على الصوابع، والحلوين متكوّش عليهم، وأنا منتظرة الراجل ولكني لا أبحث عنه، وأضافت مازحة: "بقول له بص وشوف كويس وملي نظرك شكلًا وموضوعًا.
وعن ملابسها الجريئة، أشارت إلى أنها تفعل خيرًا كثيرًا حتى يمحو الله سيئاتها، مؤكدة في الوقت نفسه أنها لا تقرب الكبائر.
وقالت غادة: "أنا لسه راجعة من العمرة من شهر ومن العمرة للعمرة يمحو الله ما بينها من ذنوب، وفي فرق بين الموبقات والكبائر وأنا لا أقرب الكبائر، وبحب ألبس لبس فاشون وبعمل خير كتير يمحي لي السيئات وبقرأ كتير في الدين وبصلي متواصل ومش بسيب فرض بقى لي أكتر من عشرين سنة، وفي الآخر الحاجات دي تعتبر من الموبقات مش الكبائر لأني مش بعمل سحر ولا قذف المحصنات ولا أكل مال اليتيم والربا وربنا يسامحني".
وتابعت: "لكل مقام مقال ولما أدخل مكان مجمع بلبس محتشم، ومقدرش أقول الحجاب مش فرض، وربنا يهديني ويسامحني وممكن الفترة الجاية أقرب أكتر من ربنا".
وعن مشهدها الجريء في فيلم "الإمبراطورة" مع الفنانة نادية الجندي قالت: "لو أقدر أشيل مشهدي كنت هشيله وهو المشهد الوحيد اللي عملته في تاريخي، والمشهد ده ما كانش مكتوب كده على الورق، وبعدها عملت 15 فيلم مفيهمش ولا حاجة، وهما في الأول كانوا عاوزين يحطوني في أدوار الإغراء وشبهوني بناهد شريف وكانوا عاوزيني آخد مسيرتها وأكون خليفة ليها ولكن رفضت أقدم إغراء تاني".
وأشارت غادة إبراهيم إلى أنها انفصلت بعد مشهدها في الفيلم قائلة: "كان فيه خلافات بيني وبين جوزي ومتفقين على الانفصال والمشهد ده عجل بالانفصال، وبعد ما شافه قال لي مش كنت عاوزة تنفصلي هطلقك، وكنت مخبية الفيلم لكن أولاد الحلال قالوا ليه تعالى شوف".
