بالفيديو - جيهان قمري تكشف سبب طلاقها وتعلن رأيها في ياسمين صبري

خلال استضافتها في برنامج "قعدة ستات" الذي تقدّمه الإعلامية مروة صبري على شاشة "القاهرة اليوم"، كشفت الفنانة جيهان قمري سبب اختفائها وابتعادها عن التمثيل السنوات الماضية، وعروض الأعمال القليلة التي تأتيها من المنتجين، كما أعلنت الأسباب الحقيقية لطلاقها، ورأيها في الفنانة ياسمين صبري كممثلة.

وقالت جيهان: "أنا بتعامل على إني برا الوسط الفني فعلاً عشان أنا براه بقالي سنين، معملتش دراما من أربع سنين، واشتغلت مسرح مع الفنان محمد صبحي من سنتين". وأضافت: "مش عارفة ليه مبيتعرضش عليا أدوار أو المنتجين يكلّموني، وبستغرب الناس اللي بتكلمني تقولي إيه ده أنتِ هنا؟؟، بقولهم ما أنا هنا عايشة في مصر هكون عايشة فين".

وتابعت جيهان قمري حديثها كاشفةً سبب ابتعاد الوسط الفني عنها، بالقول: "عشان أنا مش مزيفة، ومبعرفش أقول لحد أنت حلو وحبيبي وآخده بالحضن، ومعرفش أقول لحد أنت عامل حاجة حلوة من ورا قلبي، شخصية صريحة وبديك في وشك زي ما بيقولوا، بقالي 20 سنة في الوسط الفني عمري ما زعّلت حد، بخلّص شغلي وبمشي على طول جيهان قمري الممثلة انتهت في الاستوديو".

وأشارت إلى أن لديها كل أرقام الفنانين لكنها لم تتصل يوماً بأحد لطلب عمل، قائلةً: "عمري ما اتصلت بحد وطلبت منه شغل، الفن دلوقت كله شللية وكل شلة بتشتغل مع بعض على طول، وفي ناس بتعمل أدوار صغيرة وبتظهر في كذا عمل، ولكن أنا معرفش أعمل ده لأني مش كده، ودايماً طول عمري المخرج أو المؤلف اللي بيشوفوني في الدور بيبعتولي".

وعن هجومها على الفنانة ياسمين صبري في أحد اللقاءات، واختيارها لدينا الشربيني والتي ترى أنها ممثلة جيدة، قالت جيهان قمري: "قولت إن ياسمين صبري بتتصور كتير لأن في حاجات معينة بتبقى أوفر، ووقتها كنت بتسئل على أكتر من اسم وشفت من الناس دي كلها وأحسن حد فيهم دينا الشربيني". وأضافت: "ياسمين صبري قمر وشكل يجنن وموديل تحفة وأيقونة، ومفيش دور شفته ليها قلت واو عليها، واللي يزعل يزعل ويتقمص، بس هي ممثلة مش جامدة".

وعن تفاصيل زيجتها الوحيدة التي انتهت بالطلاق، وقررت بعدها عدم الزواج مرة أخرى، أكدت جيهان أنها تعرضت للضرب والإهانة وكان يعيش في منزلها وتنفق عليه من أموالها... موضحةً: "كانت تجربة وحشة وندمانة عليها، ندمانة إني قمت بالتجربة دي للأسف، التجربة عملتلي حالة بلوك لأي حد في حياتي للأسف، ومش عيب الواحد يتوجع، بالعكس أنا من الشخصيات اللي أي حاجة توجعني أو بحس إنها تكسرني بتقويني أكتر بتخليني أعيد حساباتي تاني وأبص للحكاية من منطلق تاني خالص".

وأضافت: "أنا كنت متجوزة مدني في قبرص فأنا اللي عملت الورق كله وأنا اللي سافرت ولغاية النهارده أنا اللي معايا الورق كله، معهوش ورقة واحدة تثبت إننا اتطلقنا، لما أخدت القرار أنا اللي سعيت لكل حاجة، على الورق اتجوزته ستة شهور وفي الحقيقة ثلاثة شهور، مطلعش راجل بمعنى الكلمة للأسف راجل بيمد إيده على ست وتقريباً كان عنده نقص بيعوضه بحاجة تانية، ده بالنسبة لي مش راجل، ومكنش ينفع أكمّل عشان أخلي الحياة تستمر، مش مستاهلة وصلت لمرحلة إني مش مستاهلة عشان أكمل ويربطني بيه حاجة. مبعرفش ومش هعرف أعيش معاكي وأنا مش حباكي، هبقى كدابة وملاوعة لو قولت مأثرش فيا وعلّمني حاجات كتير وقوّاني كتير وخلاّني أبقى فاهمة الدنيا رايحة فين وجاية منين ومش هحب عشان أعيش الحالة لا لازم أعرف هحب مين، وللأسف عشان علّمني أحب مين بطلت أحب".

وأنهت جيهان قمري حديثها بالقول: "مش أول حب في حياتي بس الحب اللي خدت فيه قرار جواز في حياتي، أخدت قرار الانفصال عشان موصلش لمرحلة لا أنا أتبهدل ولا نروح أقسام ولا أيا كان اللي هيحصل، الموضوع خلص خلاص بقاله ست سنين، هو مكنش معاه فلوس اللي كان قايله غير اللي أنا اكتشفته، وحبيته سنة قبل الجواز وقربنا سوا ستة شهور".