إشترك
خلال مداخلة هاتفية مع برنامج "ملفات" الذي تقدّمه الإعلامية أميرة بدر على شاشة قناة "هي"، أبدت الفنانة حورية فرغلي أسفها الشديد لسماحها للمذيع العراقي نزار الفارس بدخول منزلها، لإجراء لقاء تلفزيوني معها.
وقالت حورية: "أنا آسفة وأنا غلطانة إني دخّلته بيتي وأنا معاشرتوش، وهو جاي عايز يعمل "تريند"، وده حتى كلّم أشرف المساعد بتاعي وعرض عليه فلوس عشان يقول إننا اتخطبنا فعلاً".
وأضافت: "هو بيحب حورية لدرجة الجنون يعني يا حرام... أقعد أحلم أنك تتجوز حورية، يعني إزاي يقول اتخطبنا المفروض في فستان وأهل وورد وحضور... أول مرة في حياتي أتعرض لحاجة كدا، الشغل الأول كان بيخلّي عندي كذا حاجة ومشغولة، لكن دلوقت معنديش شغل، الأسئلة كانت أوفر، وسألني على فيلم "كلّمني شكراً" ومشاهدي الجريئة فيه عملتها غصب عني ولا بمزاجي؟ قولتله أستاذ خالد يوسف مبيخليش حد يعمل حاجة غصب عنه، وسألني عن عمري وهل عملت دور عن المثلية الجنسية؟ فقلت إني أصلاً معملتش دور مثلية جنسية إلا مشهد دقيقة في فيلم كان مع الأستاذة ليلى علوي".
وأردفت حورية بالقول: "أنا نفسياً مش كويسة، وحاسة إني عايشة في كابوس من أول إمبارح مش حاسة إني عايشة في دنيا حاسة إني في غابة، وده مذيع بقاله أسبوعين بيحاول يعمل معايا لقاء وقالي إنه عراقي، أنا كنت شفت لقاءه مع رانيا يوسف مرة، قولتله أوكي، قلنا نصوّر في البيت وأنا قلت أوكي وساكنة قدّام نادي الجزيرة والمنظر حلو، وأنا قولت ده كله بيصوّروا وضيف عندي في البيت".
واستكملت حديثها موضحةً: "أولاً الأسئلة اللي جاي يسألهالي أنا مستغربة أنه بيسألها تاني، وهو جاي عنده خطة معينة جاي مرتّب لها، وبعد ما خلصنا سألني بتحبي ماجد المهندس؟ وأنا قولتله عادي معرفوش أوي، فقاللي هسمّعك أغنية وطلب مني أتصوّر وأرقص معاه، وكل اللي حواليه بيلمّوا المعدّات والكاميرات، ومعرفش مين بيصوّر، ومرضتش أكسفه، ولكن قولتله مش هيبقى حلو أنا طويلة ولابسة كعب وهيبقى منظري مش حلو" .
وعبّرت حورية عن حزنها الشديد لما تعرّضت له بالقول: "ليه مكنتش صريح معايا؟ إزاي حد يقابل حد بعد خمس دقايق يقوله عايز تتجوزه؟ هو عشان أنا عندي مشكلة في مناخيري يبقى غلبانة بقى ويحصل فيا كدا؟... هو سألني إنتي متجوزة؟ قلتله لأ أنا سينغل بقالي فترة طويلة، ومش فاكرة الكلام ده كان جوّه الحلقة ولا برّاها!" .
وفي الختام، نفت الفنانة المصرية ما تردّد حول اتفاقها مع المذيع العراقي نزار الفارس لتصدّر "تريند" مواقع التواصل الاجتماعي، من طريق خطوبتهما، مؤكدةً: "أكيد مش متفقة معاه على تريند يعني هو أنا اللي رحت له العراق؟؟ واتفقت على اللقاء وبعدين أنا مش محتاجة، كان مريب وهو من أول ما دخل كان غريب وبيصوّر كتير، ومعنديش أي مشكلة الحلقة تنزل، عشان الناس هتعرف كده متفقة معاه ولا لأ".
