بالفيديو - إيمان العاصي تعترف بصفاتها السيئة.. وهذا ما قالته عن علاقتها بإبنتها

30 نيسان 2023 | القاهرة - "لها"

إيمان العاصي

خلال لقائها في برنامج The Other Side أو "الجانب الآخر"، والذي يذاع على موقع التواصل الاجتماعي "فيسبوك" ببث مباشر، تحدثت الفنانة إيمان العاصي عن مواصفات شخصيتها، مشيرة إلى أنها شخصية مترددة ومتسرعة ولا تتعلم من أخطائها، إلى جانب حديثها عن نصيحتها لابنتها.

وقالت العاصي: "أنا مترددة ومتسرعة وبخاف ومش بتعلم من غلطي وبعمل نفس القرارات وأنا شخصية بفكر كتير وأي مشكلة بتكبر جوايا ومش لاقية حل واستسلمت إن ديه طبيعتي، لكن مش مبسوطة وتخليت عن أحلامي الشخصية لأن فيه أولويات وأتجنب أقعد مع نفسي لإني خلفت وأنا 23 سنة وتحملت المسئولية".

ووجهت رسالة لابنتها، حيث قالت: "بقول لبنتي أوعي تقوليلي عايزة أتجوز وبحب حد، أنا نفسي أشوف بنتي ناجحة ومش شرط أشوفها عروسة، وعايزاها تلف العالم وتكون مبسوطة وشايفك الجواز في العشرينيات غلط والمفروض الواحد يتجوز في أوائل الثلاثينيات عشان لو عايز يخلف رغم أن العالم مش ناقص خلفة".

وتابعت: "بنتي بتحس بيا بشكل مش طبيعي وهي أحن حد عليا في الكون وأصدق حد في حياتي بكل ما تحمله الكلمة من معنى، وبنتي غريبة جدًا خاصة أن هي طفلة ومش عارفة بتفكر كده إزاي ولما بتحس إني مضايقة حتى لو ما بينتهالش بتعرف".

وأضافت: "بنتي لو زعلانة من حاجة بتحبس دموعها علشان ما اتأثرش، وبقيت أدعي ربنا أنه يخليني ليها لأنها أحلى حاجة في الحياة وصاحبتي أوي وبحكي لها اللي ممكن أحكيه لحد في سني".

وتابعت: "لما بكون معجبة بحد بقول لبنتي وكأنها 30 سنة، ومفيش حاجة بخبيها عنها لأني خايفة مكملش ومقدرش أعيش لها ونفسي تقدر نفسها وتحب نفسها وتكون هي رقم واحد من غير ما تكون أنانية ومتثقش في حد غير نفسها وأنا لأني مش عايزاها تتوجع".

وكشفت العاصي سر ابتعادها عن التمثيل لمدة ثلاث سنوات في بداياتها، مشيرة إلى أنها شعرت بخوف من الجمهور والشهرة.

قالت: "أنا ظلمت نفسي في شغلي بسبب كسلي، ومؤخرًا حاولت أسترجع شغفي، وطبعًا أنا قابلت كتير وتعرضت لسوء حظ في علاقاتي مع الناس وفيه ناس ضحكوا عليا في مجال التمثيل، ومش بكون قادرة آخد حقي منهم وبكتفي بأني أقطع علاقتي بالأشخاص دول، وبحاول أخلي بنتي عكس كدا وتتعود تاخد حقها؛ لأن مع الأسف العالم مفتقد للإنسانية".

كما تطرقت للحديث عن تأثرها بالشخصيات التي تجسدها، قائلة: "اختيار المخرج رقم واحد بالنسبالي لأن النتائج بتختلف من مخرج لمخرج، ولما بعمل شخصية بعيش معاها في حياتي ولما عملت دلال في جعفر العمدة كنت متأثرة بها، لدرجة كنت بروح بملابس الشخصية بيتي وبخرج مع صحابي بيها وبفصل بعد فترة".