إشترك
خلال لقائه في برنامج "الراديو بيضحك" الذي تقدّمه الإعلامية فاطمة مصطفى بالراديو 9090، كشف الفنان أحمد السقا حقيقة مشاركته في الجزء الثاني من فيلم "صعيدي في الجامعة الأميركية" وإنشائه قناة فضائية، حيث قال: "أول مرة أسمع إني خلاص هشترك في الجزء الثاني من "صعيدي في الجامعة الأمريكية"، أو يكون عندي قناة فضائية".
وأضاف: "لي الشرف إني أتعاون مع محمد هنيدي ومدحت العدل ومحمد العدل وسعيد حامد في جزء تاني من فيلم "صعيدي في الجامعة الأمريكية"، بس مفيش حاجة لحد دلوقتي... علاقات قوية بتربطني مع كل جيلي بس محمد هنيدي بالنسبة لي قصة مختلفة ولو طلب عينيا دلوقتي هشيلهم واديهمله، وإحنا جيل بنحب ونحترم بعض".
وعن حلقته في مسلسل "الكبير أوي 7"، قال أحمد السقا: "أحمد مكي كلّمني هو وأحمد الجندي عندنا حلقة قائمة عليك هتيجي تعملها ولا لأ؟ فقلت لهم أنا جاي ورحت صوّرت، "نفادي" جنني وموتني من الضحك، فيه حوار طلع ارتجالي على الهواء وأخدنا وقت في تصوير المشهد من كتر الضحك".
ووجّه السقا خلال اللقاء، رسالة إلى رامز جلال بعد سقوطه في فخ برنامج المقالب "رامز نيفر إند"، قائلاً: "الله يسامحه". وتابع: "أنا أكلت التعبان في برنامج رامز جلال كنوع من التفريغ العصبي".
ولفت السقا إلى اكتشافه المقلب قائلاً: "عرفت إنه مقلب رامز جلال لما ابتدى يوطّي ويرمي حاجة، وظهرلي الماسك اللي لابسه، بس والله العظيم أنا لغاية ما طلعت المطعم الطائر مكنتش عارف حاجة عن المقلب، وأول لما ابتدى طلعت فوق الكرسي ابتدى يتحرك أدركت إنه مقلب، ومرضتش أبوّظ الحلقة، وأنا بطبعي لساني مش طويل ومبعرفش أشتم ولا أتخانق".
وأضاف: "يمكن زمان في "قرش البحر" انفعلت وضربت الولد اللي كان عامل كاميرامان لأن جزمتي ومحفظتي وكل حاجة وقعت في المياه، وكنت طالع على أساس إنه برنامج لترويج السياحة وقتها ومش متوقع إنه مقلب ولما عرفت ضحكت على نفسي وطلعت عبيط".
واختتم أحمد السقا حديثه بالقول:"انا عندي فوبيا من الحشرات والأماكن العالية، بس أنا قدّام الكاميرا أقدر أعمل أي حاجة بس وراء الكاميرا بخاف من الحشرات والأدوار المرتفعة، وكنت في جهة ما بتمرن على حاجات معينة علشان شغل وعملت معايشة ومن ضمن التدريبات حاجات قاسية من ضمنها أكل الثعبان فهو جالي في ملعبي".
