كريم العدل يهاجم صنّاع فيلم محمد رمضان بسبب طول ساعات التصوير

11 نيسان 2023 | القاهرة – "لها"

كريم العدل ومحمد رمضان

هاجم المخرج كريم العدل أسرة وصنّاع فيلم "هارلي" الذي يعود به النجم محمد رمضان إلى السينما في عيد الفطر المقبل، معبّراً عن استيائه الشديد من تفاخر بعض صنّاع العمل بعدد ساعات التصوير، والتي بلغت 54 ساعة.

وكتب كريم العدل عبر حسابه الرسمي في "فيسبوك": "أنا ومخرجين كتير غيري، بنحارب طول الوقت على فكرة إننا مش هنصور أكتر من ١٤ ساعة في اليوم -اللي هو أصلاً كتير على فكرة - غير في الضرورة القصوى".

وأضاف: "فجأة نتفاجئ بأوردر تصوير بيبدأ الساعة ٤ فجر الجمعة وبيخلص الساعة ١٠ صباحاً يوم الحد؟!! ٥٤ ساعة؟؟!!!! والمفاجأة بقى إنه (فيلم) كمان مش مسلسل مثلاً، فمضغوطين علشان يسلّموا الحلقات في رمضان ولا أي حاجة رغم إن برضه المبدأ مرفوض تماماً بس يجوز تفهمه".

وأردف قائلاً: "فيعني إيه؟ وإزاي؟ وليه الناس موافقة؟ ومين اللي إدى الحق للمنتج أو المخرج إنهم يعملوا أوردر ٥٤ ساعة؟؟ ويعني إيه ممثل يقف قدام الكاميرا وهو بقاله فوق الـ٤٨ ساعة مابينامش؟؟ يعني إيه فريق إضاءة وپانثر يبقوا بيشيلوا معدات ويحطوا وينزلوا ويطلعوا لمدة تفوق الـ٤٨ ساعة؟؟ طيب فين النقابة؟؟ وهل السوق ده بقى ماشي بالسُخرة؟؟ هل الفريق تحول الى عبيد بالنسبة لكم؟؟!! طيب هل المنتج هيدفع أجر الناس يومين ونص ولا ٣ أيام ولا هيدفع بزيادة علشان يعوضهم؟؟!".

واختتم كريم العدل بالقول: "طيب لو حد بعد الشر جرى له حاجة ولا مات - وشوفناها وحصلت قبل كده - مين اللي هيتحمل المسؤولية؟؟؟!! طيب لو المخرج - اللي أنا شخصياً أول مرة أسمع اسمه - مش خايف على نفسه ولا على شغله ولا على صحته، إحنا ذنبنا إيه؟ هو مش فاهم إنه بيضر السوق كله؟؟ وإن غالباً بعد شوية ده بيتحول للعادي، وإن طالما حصلت مرة يبقى ليه ماتحصلش تاني؟؟ مش فاهم إن عنده زملا بيحاربوا في كل مشروع سواء فيلم أو مسلسل علشان مايحصلش في الكرو بتاعهم كده؟؟ عامة أنا أول مرة أسمع اسم المخرج، وأول مرة أسمع اسم شركة الإنتاج... ومع كامل احترامي ليهم أحب أقول لهم حرام عليكم وعيب... وأحب أقول للصنّاع والكرو والناس اللي ورا الكاميرا من فضلكم ماتسكتوش يا جماعة... ده مش عادي ولا طبيعي!! كفاية عبث في الشغلانة... العبث اللي فيها مكفيها والله".