بالفيديو- حمو بيكا يُحدث ضجة بتصريحاته الجريئة عن هاني شاكر وعمرو دياب ويكذّب حسن شاكوش!

حلّ مطرب المهرجانات حمو بيكا ضيفاً على برنامج "العرّافة" الذي تقدّمه الإعلامية بسمة وهبة على قناتَي "النهار" و"المحور"، حيث فتح النار في تصريحاته على الفنان هاني شاكر نقيب الموسيقيين السابق، كما كشف العديد من أسرار كواليس تعاونه مع حسن شاكوش وعمر كمال.

وقال حمو بيكا: "أنا مؤدي وبعترف بده، وحسن شاكوش مصطنع وبيتصنع على الناس ومتكبر ومغرور، أنا المدرسة اللي طلعت حسن شاكوش".

وتابع: "حسن شاكوش مكنش عنده استوديو وهو بيحط ممول عشان أغانيه تجيب مشاهدات، أول أغنية عملتها لحسن شاكوش جابت 15 مليون مشاهدة، وأنا اللي طلعته للنور ولما اشتهر والغرور خده مني بقى يعمل أغاني لوحده".

وعن حفل زفاف شاكوش، أكد بيكا أنه لم يتكلّف 4 ملايين كما ادّعى، مشيراً إلى أن شاكوش كذب في هذا الشأن من أجل ركوب "الترند". إذ قال: "فرح حسن شاكوش متكلفش 4 مليون جنيه ده كذاب، اتكلف 300 ألف جنيه... وفرحي اتكلف 50 ألف جنيه وبعد ما عملت جمعية".

وأضاف: "أنا وقفت في فرح حسن شاكوش للآخر، وهو بيقول كل الناس مخدتش فلوس بس الله أعلم محدش يعرف حاجة، أومال هو صرف الـ 4 مليون على إيه؟ وفي مطربين خدوا منه فلوس، لكن الفنان تامر حسني مخدش فلوس وهو شخص طيب... حسن شاكوش بيحب السهر مش بيحب الشغل... أنا بشتغل مش بسهر وهو مش مركز في شغله... أنا العالم كله يعرفني ولكن هو لأ... وساب مراته وراح بيسهر ومراته بتنصحه بتقوله انزل اشتغل".

وعن أزمته مع نقابة المهن الموسيقية حين كان يرأسها النقيب السابق الفنان هاني شاكر، قال إنه يلقّب نفسه بـ"عمرو دياب الغلابة"، معلقاً: "أنا عمرو دياب الغلابة وعندي الدليل. كل اللي هاني شاكر عمله معايا إنه قعدنا في البيت وهو كل شوية عمال يتكلم إنه جابلي سنتين حبس، وأنا راضي بالقانون بس كل اللي هو عمله معايا ظلم لما يخلي كل بتوع المهرجان يغنّوا وأنا لا".

وتابع حمو بيكا حديثه موضحاً: "ربنا جابلي حقي وجابلنا نقيب ربنا يخليه لينا، والمجلس القديم جايبنلي مدرس يقولي لا ليه لا، وهاني شاكر على دماغنا وكل اللي هو عمله إحنا عملناه برضو. النقيب مصطفى كامل نقيب الموسيقيين على دماغنا من فوق وهو اللي جابلنا حقنا... والمهرجانات اسمها أغاني وليس مهرجانات ونقيب الموسيقيين لا يرغب في تسميتها مهرجانات".

وأضاف: "وافقنا على رغبة مصطفى كامل وأصبحنا نطلق على المهرجانات اسم أغاني ولا نشعر بالحزن أبداً، الأغاني الخاصة بنا لا نطلق عليها أغاني شعبية".

وعن علاقته مع عمر كمال وحسن شاكوش، قال حمو بيكا: "أنا ساعدتهم ووقفت جنبهم وكلهم باعوني عشان أنا أهبل وحظّي وحش وأستاهل، وكانوا بياخدوا 400 جنيه دلوقتي بياخدوا 40 و50 ألف بسببي".

وأضاف: "أنا مابعرفش أقرأ ولا أكتب بس أنا أسرع من عمر كمال وحسن شاكوش في إني أغني، ولما بييجوا يقفوا على المايك ويغنوا معايا بيبقى الأداء بتاعي أحسن وأسرع".

وأكد أن عمر كمال لا يجيد فن الغناء، موضحاً: "وربي اللي خلقني عمر كمال مابيعرفش يغني ويعني إيه صوته حلو هي مش بالصوت، وأنا صوتي على قدي وليا جمهور كتير والناس كلها بتحبني".

ولفت حمو بيكا الى أنه كان يوجّه حسن شاكوش أمام الميكرفون، مضيفاً: "كنت بوجه حسن شاكوش يقف قدام المايك لما ييجي يغني، وهو اللي جه يقولي عايز أغني معاك ومكنتش أعرفه".