إشترك
حلّت الفنانة ريم البارودي ضيفةً على حلقة خاصة من برنامج "صبايا الشمس" الذي تقدّمه الإعلامية ريهام سعيد عبر قناة "الشمس" الفضائية، وذلك بعد خلاف بينهما استمر ثلاث سنوات.
وكشفت ريم خلال الحلقة تفاصيل مشكلتها مع ريهام بعد فترة طويلة من الشدّ والجذب، حيث واجهتها على الهواء، بعد الأزمة التي حدثت بينهما على الشاشة ووصلت الى ساحات القضاء، وقالت ريهام: "إحنا قبل رمضان بثلاثة أيام بالظبط وهو ده وقت التسامح والمغفرة وأن الواحد يقف وقفة مع النفس ويعرف إن الحياة مش مستاهلة وكل الخلافات والصراعات اللي بندخل فيها ما هي إلا هيافات ومبنقدرش نعرف قيمة حد إلا لما نفقده، وأنا وريم طالعين علشان ندعو للتسامح والمغفرة والسلام، وبنقول أي اتنين زعلانين من بعض يرجعوا يكلموا بعض وأي اتنين متجوزين على خلاف يرجعوا يصفّوا خلافهم".
وأضافت: "أنا وريم البارودي اختلفنا على الشاشة ومن بعدها متكلمناش ولا اتعاتبنا ومن كتر ما كان فيه اشتياق متكلمناش إحنا زعلنا من بعض ليه ولا إيه اللي حصل".
وعلقت ريم قائلةً: "أنا وريهام سعيد فينا كتير من بعض، حتى جورج بتاع الكوافير واحنا بنستعد للحلقة بيقولي أنتوا شبه بعض، وأحياناً الجمهور كان بيغلط فيا ويقولي إنتي ريهام سعيد، أنا في الأصل اسمي ريهام"، لتعقب ريهام سعيد بالقول: "المفاجأة أن اسمها ريهام وفينا من بعض كتير والاسم واحد".
وقالت ريم: "أنا شخص عصبي وبقيت كمان عصبية أكتر للأسف بس لما ببقى غلطانة ببقى عارفة إني غلطانة"، لتردّ عليها ريهام: "قلت لها أنا سايباها من ثلاث سنين مجنونة دلوقتي بقت مجنونة رسمي".
ولفتت ريم: "الخلاف بيني وبين ريهام سعيد ابتدى إن فيه شخص ما بينا ادعى إني قلت له في التليفون ليه بتنشر حاجات كويسة عن ريهام؟ وده شخص كداب وهو موجود يواجهني إحنا داخلين على رمضان وأتمنى يتفرج على الحلقة ويعتذر وأنا هقبل اعتذاره"، لتعلّق ريهام: "إحنا الاتنين بنتكلم في هيافات بس علشان نوصل إن مفيش خلاف بينا، ولا هي خطفت جوزي ولا قلت عليها كلمة مش لطيفة".
وقالت البارودي: "بداية الخلاف مع ريهام سعيد إن حد من الفانز بتاعها علق لها على بوست نشرته وبيسألها عن حاجة فكانت زعلانة وقالت: ريم البارودي بالنسبة لي ماتت، راح بابا الله يرحمه مكلمني وقال لي ليه ريهام بتقول عليكي كده، وأنا وقتها كنت في مرحلة مش متوترة لأ مجنونة بجري في الكوريدور بتاع قناة النهار وأول مرة أظهر مذيعة، وقتها بعت للشخص اللي عمل الفتنة بيني وبين ريهام فراح مخرجني من الموضوع وقاللي أصلها غيرانة منك علشان مضيتي المسلسل الجديد مع الفنانة زينة مع إني بشتغل معاها علطول".
وعلقت ريهام سعيد: "اللي حصل إن الشخص اللي وقع بيننا ده كلمني قال لي إنتي بتعاتبيه إنه عاملني في الاستوري كل سنة وأنتي طيبة، فرد عليكي أنا أكلمها زي ما أنا عايز ما أنتي بتكلمي زينة وأنا مش بكلمها فإنتي قولتليه أنت بتقارن مين بمين"، لترد ريم البارودي: "الفويسات معايا وتعالي نطلعها للناس ونشوف التسلسل بتاعها إزاي لإن اللي اتقالك كذب وإنتي سخنتي على الفاضي"، لترد ريهام سعيد: "مينفعش نعرضها دي قضية".
وأشارت ريهام: "أنا عملت لايف بعد الأزمة وقلت ريم طيبة ومتقصدش وهي بس بتتنرفز ومن النوع العصبي اللي بتطلع تطلع وتنزل على مفيش"، لتعلّق ريم البارودي: "أصلاً سبب المصيبة دي وهو شتام وبيجيب في أعراض الناس وعملي مونتاج مجتزأ للفويس اللي بينا، وما شتمك إلا اللي بلغك".
وأكدت ريم البارودي: "الميك اَب ارتيست أمين بيعمل لسمية الخشاب وبيعملي وقرّب وجهات النظر وأنا وسمية اتصالحنا وأول الناس اللي قدمت واجب العزاء في وفاة والدي وهي حياتها خلاص انتهت مع أحمد سعد وأنا كمان حياتي انتهت معاه فخلاص التلج بيدوب وبقيت أبارك لها على أعمالها ولما والدتها توفيت كلمتها".
ولفتت: "كنت هصالح ريهام سعيد عادي وأوضح لها القصة ولكني انصدمت وتفاجئت إنها رفعت قضية ضدي ولكنها في النهاية اتحفظت والمحضر كان ازعاج والفيش والتشبيه بتاعي زي الفل".
وقالت ريم البارودي: "في صحفي تدخل بيننا وهو اللي أرسل الفويس نوت ولو الرسالة مكنتش نزلت على مواقع التواصل الاجتماعي كان زمانا متصالحين".
تابعت :" فوجئت بعد ذلك برفع قضايا ضدي"، لترد ريهام: "أنا كنت هتنازل عن القضية ثلاث مرات ولكن في ناس منعوني".
وفي ختام الحلقة، التي تم تصويرها في منزل ريم البارودي، كانت ريهام سعيد تقف أمام حمّام السباحة، وتتبادل العتاب مع ريم على فترة الخصام بينهما.
وخلال الفقرة، قالت ريهام سعيد: "ريم صاحبتي وأختي وكل حاجة، لكن بصراحة هي مجنونة"؛ لتدفعها ريم البارودي الى حمّام السباحة وهي تمازحها بالقول: "أنا مجنونة؟... أنا عصبية آه، لكن مش مجنونة".
