نصيحة شيرين رضا للأمهات: "لا تدعي زوجك يضرب بناتك لهذا السبب"

02 آذار 2023 | القاهرة – "لها"

شيرين رضا

وجهت الفنانة شيرين رضا رسالة شديدة اللهجة للأمهات، تنصحهن خلالها بعدم السماح لأزواجهن بأن يعنفوا بناتهن.

وقالت شيرين في تصريحات صحافية: "في أمهات بيسمحوا لأزواجهم يمدوا إيدهم على بناتهم.. وده مش مقبول، لما تخلفي وتجيبي طفل الدنيا، مش ذنبه إنك اختارتي تجيبيه، ولازم تحافظي عليه لحد ما يكبر، ومينفعش تسيبهم لأي حد يلطش فيهم".

أما عن الفرق بين تربية الأولاد والبنات، فعلقت قائلة: من المفترض البنات بيسمعوا الكلام أكتر، ومش هقدر أقول تربية البنات ولا الولاد أسهل بالنسبة لي؛ لأني عندي بنت في الحقيقة إنما في التمثيل بنكون أصحاب، هما بس قدام الكاميرا بكون أمهم".

وتطرقت للحديث عن كواليس ظهور والدها الفنان محمود رضا، ضمن أحداث مسلسل "وبينا ميعاد" في أحد المشاهد، قائلة: "مكنتش راضية ومعترضة عليه؛ لأن المشاهد بقاله 20 حلقة مثلًا بيتفرج عليا في شخصية نادية".

وأضافت: "لما يظهر محمود رضا كدا هو كسر الشخصية، ورجع الجمهور لشخصية شيرين رضا، أنا أكيد عايزه أبويا بس عايزه أفضل نادية، ومكنش فيه تلفزيون قدامنا كان كاميرا".

وعن الفرق بينها وبين شخصية نادية، قالت: "أنا مش أم صارمة تمامًا وفيه مشاهد مكنتش عايزة أقول الكلام اللي فيها لأنه مش شبهي، وشخصية نادية لا تشبهني وأنا أمي مربتنيش كدا ولا ربيت بنتي كدا بس حبيت شخصية نادية بردو؛ لأنها حقيقية ومسكينة وبحترمها لأنها عرفت تربي بناتها وتاخد بالها منهم، ولما جت تختار بين بناتها وحبها اختارت بناتها".

وأكدت شيرين رضا، أن الجمهور كان متشوقا لمتابعه أعمال فنية يحبها، معلقة: "الناس جعانة تشوف حاجة حلوة، وإحنا عارفين إننا بنعمل حاجة عليها القيمة، ومش بنستفز الناس بالشنط والعربيات وبابي ومامي والرموش والجزم، بالعكس قدمنا شخصيات شبهنا في اللبس والمناطق اللي عايشين فيها".

واستكملت قائلة: "الأسرة بتتفرج على (وبينا ميعاد)، وهما مش مكسوفين ولا عيالهم مكسوفين لأن مفيش كلام خارج، عشان كدا كان باين إننا هننجح من الأول ولكن محدش يعرف أننا هننجح النجاح الكبير دا".