بالفيديو - لؤي يبكي بسبب والدته.. وهذا ما قاله عن زوجته اللبنانية

18 شباط 2023 | القاهرة - "لها"

لؤي

خلال لقائه مع الإعلامية ياسمين عز في برنامجها "كلام الناس" المُذاع عبر شاشة mbc مصر، دخل المطرب لؤي في نوبة بكاء خلال حديثه عن والدته، مشيرًا إلى أنها ضحت من أجله ومازالت تضحي، كما كشف لأول مرة تفاصيل عن حياته الشخصية وبداية تعارفه على زوجته اللبنانية.

وقال لؤي: "أنا بحب أمي جدًا، وبستغرب لما أعرف أن فيه حد بيقعد 10 أيام مش بيشوف والدته، ولما كبرت وخلفت اكتشفت أن أمي ووالدي ضحوا بعمرهم وصحتهم علشاني، ولحد دلوقتي بيحسوا بيا لو متضايق، وعندهم حب غير مشروط، أنا عملت مصايب كتير جداً في حياتي ورغم ذلك ساعدوني بكل الطرق علشان أخرج منها، ودول هما أكتر ناس بيخافوا علينا لحد ما يروحوا لربنا".

وعن علاقته بزوجته اللبنانية، قال: "أنا مؤمن بالمساواة بين الرجل والمرأة في المشاعر والأحاسيس والحب، وأنا بفتكر مراتي طول السنة مش جاي أفتكرها في عيد الحب بس، ومراتي لبنانية كنا في كلية واحدة وارتبطنا واتجوزنا، وهي صوتها حلو وبتكتب أغاني كمان، وعملت لي أغنيتين قبل كدا، وعملتلي أغنية خاصة بيا يوم فرحنا اسمها "هغني ليك".

أما عن سر استمرار زواجه لعدة سنوات، علق لؤي قائلاً: أنا اكتشفت أن الكلمة الحلوة والطيبة حسنة وبتفك حاجات كتير أوي والحضن بيصلح حاجات أكتر، والعلاقة الطيبة لازم يكون فيها صدق لأننا في زمن فيه كدب كتير، ولازم الطرفين يقولوا إيه مضايقهم من التاني.

ورد على اتهام الفنان مدحت صالح له بالتقصير في حق نفسه، مشيرًا إلى أنه لم يقصر في فنه ولكن صناعة الموسيقى في الوقت الحالي صعبة.

وقال: "مدحت صالح قال عليا مقصر في برنامج شهير، وهو فاهم كويس جداً إني مش مقصر وهو في الصناعة وعارف، ودي مش أول مرة يقول عليا كدا، الراجل من زمان بيحب صوتي وبيقول دا دايمًا، ولكن إشمعنا لما قال إني مقصر الدنيا كلها كلمتني؟".

وواصل لؤي: "الموضوع مفيهوش تقصير ولا كسل، أنا قعدت فترة بس أتأمل لأني وحيد أمي وأبويا ومليش إخوات، وأتأمل في شئون البشر والدنيا دي إيه، وبفكر مع نفسي كتير، وكمان ظروف صناعة الموسيقى حاليا صعبة علينا كلنا".

وعن سبب ابتعاده عن الساحة الفنية لفترة طويلة، قال: "أنا لم أبتعد عن الوسط الفني، ولكن مع الأسف الناس بيحبوا تتبع المشاكل وعورات الغير، وبدل ما يبص للفن اللي بنقدمه بيبص للفضايح ومين أتجوز ومين أتطلق، وكمان من 2008 صناعة الموسيقى ضايعة خالص بسبب الإنتاج".

وأضاف لؤي: "فيه أزمة في حقوق الملكية الفكرية، وبقينا كمطربين ننتج الأغاني لنفسنا وطبعا دي مسؤولية كبيرة خاصًة أننا عندنا بيوت وناس ورانا، وبقول للجمهور أنتوا متعرفوش الفنان دا بيصرف إزاي والتزاماته إيه، ومن بداياتي خالص كنت متعود يكون معايا شركات إنتاج، إنما دلوقتي مفيش إنتاج ودا بقى على عاتقي، والأغنية عمرها ما بتجيب عائد الإنتاج، وصناعة الموسيقى كمان مش بتجيب فلوس، ونشوف كام مطرب وملحن وموزع بعدوا عن الوسط بسبب الظروف دي، ومع ذلك أحنا بنحاول نكمل؛ لأننا بنحب الفن.