بالفيديو - راقصة مصرية تثير الجدل بتصريحاتها: "زوجي سرقني وأُصبت بالاكتئاب"

خلال لقائها في برنامج "قعدة ستات"، الذي تقدّمه الإعلامية مروة صبري على شاشة "القاهرة اليوم"، كشفت الراقصة صفوة تفاصيل طلاقها، مشيرةً إلى أنها مرت بحالة اكتئاب حادة أدت إلى سقوط شعرها بالكامل.

وقالت صفوة: "أنا اتطلقت من جوزي ثلاث مرات ومرتين لأسباب لا داعي لذكرها، وآخر طلقة جالي اكتئاب وشعري وقع وبقيت أركّب بواريك لدرجة مفيش شعر أركب فيه بنس الباروكة، منها فيلم "الرغبة" ساعتها كنت لابسة باروكة وناس كتبوا إني مش هشتغل تاني وبمر بفترة اكتئاب".

وأضافت: "جوزي سرق فلوسي ودخّلني السجن عشان أنا حمارة، ومش أنا لوحدي بقول كده في ستات سامعين كلامي، وبيقولوا نفس الكلام، هو عمل كده رغم أنه كان بيعمل حاجات كويسة جداً معايا ومع أهلي كمان، ومخّي ساعتها مكنش قادر يستوعب إن الخير اللي كان بيعمله مني أنا".

واستطردت صفوة بالقول: "لما كان حد بيقول على جوزي إنه مش كويس وشوفي مستقبلك، مكنتش بصدّقهم، وأعمل لمستقبلي، وأنا كنت بالنسبة ليه الفرخة اللي بتبيض ذهب، وأنا عمري ما كنت بفكر وراه، وأنا مكنتش مستوعبة إنه بيصرف من فلوسي".

وتطرقت صفوة للحديث عن صعوبات مهنة الرقص، قائلةً: "الرقص مهنة صعبة لأن الراقصة بتشتغل مع أكثر من 40 راجل، ولكني اعتزلته من 14 سنة وبذلت مجهود كبير عشان أثبت نفسي في التمثيل وأمحي لقب راقصة لأن كلمة راقصة المجتمع مش بيقبلها وخاصًة لو مجتمع شرقي، على الرغم من إني كنت بكسب كتير من الرقص". وأضافت: "الراقصات المحترمات أصبحن قليلات، منهن بوسي، دينا، وفيفي عبده ودول فنانات وراقصات محترمات وفوق دماغي، ولكن مع الأسف شغلهم أصبح أقل، ومن عشر سنين ظهر العديد من الراقصات زي صافيناز، وكل ما العري زاد الراقصة بتكبر".