ياسمين صبري تتواصل مع الجمهور عن الرجال وشريك الحياة

تواصل الفنانة ياسمين صبري إجراء نقاشات مع جمهورها عبر موقع "تويتر" بجلسة حوارية عبر خاصية "سبيس" التي يتيح الموقع من خلالها فتح دردشة مباشرة مع المتابعين.

وكشفت ياسمين عن رأيها في سؤال: هل ممكن تلاقي شريك حياتك الصح من الـdating apps أو تطبيقات التعارف، حيث كشفت عن رأي مختلف لما طرحه أغلب المشاركين في الحوار، حيث تحدث الجميع عن هذه التطبيقات وفكرة اكتشاف الشخص، لكنها كانت تنظر للموضوع بنظرة أخرى وقالت: "إحنا بنتكلم عن تطبيق للتعارف في الوطن العربي ومصر يعني مع مصريين ورجال شرقيين، الراجل الشرقي في قلبه هيبقى ضد إنه عرف مراته أونلاين وهيبقى ضد جداً إنه خرج معاها علشان كلمها من الإنترنت وخياله هيفضل يقوله بصوت خافت هي نزلت مع مين قبل كده وحصل إيه، طريقة التعارف نفسها هتبقى مشكلة، الجواز حاجة كبيرة وعمر طويل حاجات بنبنيها مع بعض هتكتشفوا حاجات مع بعض لكن هتلاقي الرجل مرة يقولها أنا عرفتك من الإنترنت كأنها إهانة".

وأضافت: "دي مش أصلح طريقة إحنا في النهاية مجتمع شرقي مسلم متدين، حتى لو مش بنصلي الخمس فروض الدين دا في الجذور، هيبقى نقطة بالسالب للبنت، الولد لما بيدخل على التطبيق عشان يتعرف على حد مش بيكون جدي، واحد في المية بس اللي بيكون بطريقة جدية لكن الباقي تسالي أو حد خارج من علاقة وبيسلي نفسه، ممكن البنت أه تفكر بطريقة تانية 50% منهم ممكن يكون داخل التطبيق وبيفكر بطريقة جدية.

وتطرقت ياسمين صبري في حديثها عن علم الطاقة الذي تدرسه وأعطت للجمهور بعض النصائح كما تحدثت عن التعليقات السلبية التي تتلقاها وكيف تحولها إلى طاقة إيجابية، وقالت: "أنا ست مشهورة وكل واحد بيقول رأيه كل دقيقة واحد يقول مش ذكية وواحد يقول هي فاضية وواحد يقول خدت كل حاجة بسهولة ومحظوظة لو طاقتي أضعف من كل دا هاخد الكلام وأقول أنا مش في مكاني وعندهم حق، وأعيش الفكرة وأضيع النعمة اللي ربنا أدهالي، واخليها نقمة، أمتى أبقى قد الموضوع وطاقتي أكبر لما أقول مش مهم واللي يقول يقول وأحول طاقة الحسد لبركة ورزق وجمال وأقول يارب حول كل حاجة سلبية جيالي من أشخاص لبركة وعوضهم خير ليا وليهم، وبتمشي، أنا بعلى وبكسب والبراندات تطلبني والمسلسلات والأفلام تتعرض عليا من كتر ما الناس بتتكلم عني".

وقدمت ياسمين صبري نصيحة لجمهورها قائلة: "سواء بنت أو ولد لو عاوز حاجة معينة اسأل إزاي أوصل لها وحط دايما في نهاية الكلام علامة استفهام متحطش طلب ونقطة، واسأل دايما إزاي أكون النسخة الأفضل مني".

وعن فكرة أن المرأة ضحية ونظرة المجتمع لها قالت: "سعيدة إن ربنا خلقني ست، الست عندها قوة أكبر من الرجل لكن قوة ناعمة مش بالدراع والصوت، ربنا أدالها مميزات كتيرة، في فرق بين القط والقطة، القطة الانثى تصرفاتها غير القط وهما معندهش العقل اللي ربنا أدهولنا، أبدا عمرها ما كانت الست ضحية ومش الهدف أنها تعمل عقلها بعقل الراجل إحنا بنكمل بعض لازم أبقى عارفة إحنا بنكمل بعض إزاي.

مقالات ذات صلة

عمرو سعد يتحدّى: لا أحد يمكنه تقديم أدواري

مي عمر تكشف سبب غيابها عن مواقع التواصل الاجتماعي

ياسمين صبري نجوم الفن تويتر