بالفيديو - صفاء جلال تعترف بعمرها الحقيقي وسبب خضوعها لحمية غذائية

حلت الفنانة صفاء جلال ضيفة على برنامج "كلم الناس" الذي تقدمه الإعلامية ياسمين عز على قناة mbc مصر، حيث كشفت عن خضوعها لبعض العمليات من أجل التخسيس، مشيرة إلى أنها خضعت لعملية نحت قوام في السابق، بالإضافة إلى حديثها عن نصيحة الزعيم عادل إمام لها في الفترة التي مرت فيها باكتئاب، وكشفها عن عمرها الحقيقي.

قالت صفاء: "بعد سن الأربعين قابليتك للنزول في الوزن بتكون قليلة علشان كده بحاول ألحق نفسي واشتغل على نفسي وأروح الجيم وأعمل عمليات، وعملت عملية نحت من فترة، لأني كنت تخنت بشكل كبير وبعد فترة سبت نفسي وتخنت تاني وخدت كبسولة المعدة علشان كنت بأكل كتير وعندي مشكلة في الأكل بليل وخسيت 15 كيلو وبكمل دايت وبروح الجيم".

وتابعت: "مجهود كبير على أي ست بالذات الستات اللي عدت 45، ولكني بعمل ده لأن الناس بتتخض لما تشوفني على الرغم من أنه عادي إني أتخن لأن أنا ست من حقي آكل وأشرب، لكن الناس متعودين عليا إني رفيعة وفي جميع أعمالي اللي قدمتها كنت 63 كيلو وطول الوقت بحاول على قد ما أقدر أوصل لشكل معين الناس تتقبله".

واستكملت: "لما تاخدي قرار بتتحملي مسؤولياته بكون عارفة إني هتعب بعد العملية، ولكن مافيش حد هيلجأ لحاجة صعبة إلا وهو محتاجها".

وأكدت أنها لم تخضع لعمليات تغير من شكلها، قائلة: "مش بغير شكلي لكن شكلي هو هو من بدايتي حتى الآن، لكن بضطر أعمل بوتكس وفيلر خفيف من غير تغيير، وبأكد على الدكاترة إني أكون زي ما أنا لكن بحاول أشيل شوية من التجاعيد".

وتحدثت عن نصيحة الزعيم عادل إمام لها، قائلة: "اشتغلت مع عادل إمام في مسلسل "صاحب السعادة"، وكنت رفيعة شوية، وغبت شوية بعد كده شاركت كضيفة شرف في مسلسل "عوالم خفية"، وكنت تخنت شوية، وقالي إيه يا صفاء في إيه تخنتي ليه، قولتله يا أستاذ الاكتئاب، الواحد بيبقى مكتئب وبياكل بس، وقالي إوعي تزعلي وتكتئبي، افرحي على طول، وحبي الدنيا، ومتبصيش للجانب السلبي في الحياة، بصي للجانب الإيجابي، وخليكي مبسوطة على طول عمرك ما هتكبري".

وأردفت حديثها عن عمرها الحقيقي، والأزمات التي يسببها لها توزيع الأدوار قائلة: "أنا داخلة على 49 سنة دلوقتي، ومش بتكسف أقول أنا عندي كام سنة، والناس ذكية عمري ما هطلع أقولهم إني عندي 35 سنة، في الشغل بيبقى شايفين إن أنا صغيرة على الأدوار، بقولهم تمام هعمل أدوار كبيرة، بيقولوا لا ما أنتي كبيرة على أدوار تانية، ويوجد لحظات بعمر كل فنانة بيبقى السن بالنسبالها عقبة، ودلوقتي بعمل أحسن حاجة بتجيلي علشان أقدم أدوار كويسة للجمهور".

وتحدثت عن زواجها، مشيرة إلى أنها تزوجت في سن الرابعة والعشرين من رجل شرقي، قائلة: "طول ما فيه مودة ورحمة، الدنيا هتمشي، كل واحد فينا عنده مشاكل بيرجع بيها البيت، وبتحاولي تعملي توازن وتحاولي تحتوي جوزك وولادك حتى لو اتخانقنا إحنا مش ملايكة طالما بنحب بعض وبنقدّر بعض".

وأضافت: كل واحد فينا بيختار على حسب أولوياته، في واحدة أولوياتها تكون نجمة، وبتشوف أن شغلها بيديها الإحساس بالسعادة وكل شيء، وفي حد تاني بيختار البيت وفيه ناس بتختار الاتنين وأنا اخترت البيت وزوجي وبناتي وبعدين شغلي".

وأوضحت: "اتجوزت وأنا عندي 24 سنة واخترت أتجوز راجل شرقي وأمشي على هواه، وهو بيحاول يعمل كل حاجة علشان يبسطنا، ولما بيلاقيني بنجح بيشجعني وبيكون فرحان، والحياة الزوجية شراكة، والحمد لله بعمل شغل كويس ومش بيأثر على حياتي وبيتي وبناتي".

واستكملت صفاء جلال: "90 في المائة من صحابي مطلقات لأنهم ما عرفوش يتعاملوا ويتوافقوا، وفيه رجالة عاوزة الحرق".

وكشفت عن رد فعل زوجها لها بعد أن جسدت دور راقصة في مسلسل "امرأة من زمن الحب"، قالت: "الحقيقة إن جوزي قالي مش هتعملي دور رقاصة تاني، اتجوزته على طول بعد الدور في امرأة من زمن الحب على طول، قالي هنكمل تمثيل، بس مفيش رقاصة تاني، وعشان كده معملتش دور رقاصة تاني، وبعد الدور كان كل الأدوار اللي بتجيلي رقاصة بس، بعد كده ريحت شوية وطلعت بأعمال مختلفة، وعجبت الجمهور".

وتابعت: "هو الجواز عامة تفاهم واحترام، وحاجات كتير لازم نبقى إحنا الاتنين في المركب مع بعض، ونشوف إيه اللي يزعل التاني ومنعملهوش، والست بتتنازل عشان المركب تمشي، بس في نفس الوقت بتتنازل في الحق، واحترمته جدًا في وجهه نظره، ولما خلفت بنات كان الموضوع مختلف، ولما الدور بيجيلي بشوف لو في أي محاذير أخلاقية مش بعمله، حتى لو هيعملّي إيه".

واختتمت صفاء جلال: "هو التنازل مش التنازل عن رأيك، بتشوفي الموضوع رايح فين لو هيسبب مشكلة بينا نبعد عنه، بقالنا 24 سنة وأكتر، ومندمتش بحاجة خالص، وبحمد ربنا على كل حاجة جوزي وبناتي وأمي وصحابي، والناس بتقولي في الشارع بنحبك وبنحترمك، وببقى مبسوطة بده.

مقالات ذات صلة

بالصور - غادة عبد الرازق تحتفل بنجاح مسلسل "صيد العقارب"

صفاء جلال تكشف تفاصيل نجاتها من الموت وهذا ما تطالب به الجمهور

صفاء جلال