بالفيديو - أحمد برادة يكشف موقفه من الزواج مرة ثانية ومحاولة اغتياله

24 أيلول 2022 | القاهرة - "لها"

أحمد برادة

حل بطل الاسكواش العالمي والفنان والمطرب أحمد برادة، ضيفاً على الإعلامية ياسمين عز ببرنامجها "كلام الناس" الذي تقدمه على قناة mbc مصر، حيث تحدث عن الحب في حياته، مشيرًا إلى أنه قرر ألا يتزوج مرة ثانية ويعيش لابنتيه فقط، وأن الحب أصبح بالنسبة له هو النجاح.

وقال برادة: "عايش لوحدي أنا وبناتي وأمي وربنا كرمني ببنتين هما أعظم بنتين بالنسبة لي وحياتي كلها ليهم ومبسوط وأنا معاهم وبكون مضايق لما يروحوا النادي، وهما الحمد لله متربيين كويس".

وأضاف: "مش هتجوز تاني.. ربنا عمل لي كل حاجة ومش عاوز أكتر من كده.. مش عارف يعني إيه حب وما بقتش عاوزه ومش بفهمه خلاص، موضوع الحب قفلته من5 سنين وخلصت المواضيع ما عنديش حد تاني في حياتي.. ما عنديش وقت.. ربنا بياخد من حتة ويدي من حتة تانية كتير جدًا فوق ما تتصوري، وحبي بقى للشغل والنجاح ونفسي ربنا يقف جنبي إني أعمل حاجة كويسة لبلدي".

وصرح بطل الاسكواش العالمي بأنه أحب الموسيقى لكنه لم يجد نفسه مع التمثيل، مضيفًا: "أنا بحب السرعة والإنجاز لكن إني أعيد مشهد، صعب بالنسبة لي علشان كده مالقتش نفسي في التمثيل".

ولفت إلى أن ليلى علوي هي من رشحته للمشاركة في فيلم "حب البنات" وأن أحمد عز كان صديقًا مقربًا له، مضيفًا: "الفيلم كان مقبول ولذيذ وتجربة ربنا وفقني فيها، ومش عارف ليه الناس حبت أغنية نسيني وأنا جنبك، وبزعل إن الناس بتفتكرني بـ"حب البنات" مش بالاسكواش".

وكشف برادة، العديد من الأسرار في حياته الشخصية والمهن التي عمل بها وسبب تركه للتمثيل، إضافة إلى حديثه عن تفاصيل اتجاهه إلى عالم البيزنس والمقاولات.

كما كشف حقيقة الأخبار التي انتشرت قبل سنوات عن تعرضه لمحاولة اغتيال بسبب علاقة عاطفية، قائلًا: "الموضوع مش كده لكن كان واحد تافه سرق حاجة من فيلتنا وخربشني ولقيت الدنيا ولعت وكتبوا اغتيال وكلام تاني ما حصلش، ولعبت بعدها بشهر وكملت أربع سنين".

وأضاف: "من ضمن الحاجات اللي بنتعرض لها وإحنا صغيرين الشائعات عليه والكلام بيتعب، ومش عاوز الناس تفهم كلامي غلط لكن ماحدش يقدر يهددني لأن الإنسان اللي اتربي صح مش بيخاف وأنا والدي قائد من اللي اشتغلوا في حرب أكتوبر".

كما تحدث برادة عن شقيقته قائلًا: "أختي أهم حاجة بالنسبة لي هي وزوجها وعايشين في لندن وهما دول عيلتي، مشيرًا إلى القصة التي انتشرت قبل سنوات عن أن سبب دخوله مجال الاسكواش كان بسبب تحدٍ مع شقيقته التي هزمته، قائلًا: "قصة غلط كانت بتلعب معايا ما كسبتنيش وما حصلش الكلام ده، والإشاعة دي بقى لها 25 سنة لدرجة ان أختي صدقت نفسها أنها كسبتني.

كما تطرق إلى قصة دخوله عالم البيزنس، قائلًا: "الموضوع في البداية كان صعب جدًا وصعب أني أكون مسؤول عن عمال والموضوع كان كبير عليا، وكنت في وقت من الأوقات من خمس سنين وقعت واقعة كبيرة جدا وكنت ولا حاجة، لحد ما اتعرفت على صديقي هاني المصري زي أخويا وشريكي في كل حاجة، ابتدينا الشغل واشتريت حديد واشتغلت في الخردة وقال لي هنعمل برادة للمقالاوت".

وأضاف: "ابتديت واجتهدت من 5 سنين بقيت أروح للمقاولين وماكنتش بتكسف، وكانوا بيتكسفوا مني وواحد أداني مصنع، واسمي خدمني وحب الناس لا يشترى والحمد لله ابتدينا في تجارة الحديد عملنا اسم ناجح".

وتابع: "عمري ما بصيت للفلوس ببص للنجاح بس وما عرفش عندي كام ممكن من كترهم ماعرفش كام.. واللي بيجي بعمل بيه مصنع وأشتري آلات".