بالفيديو - بدرية طلبة تكشف سبب خلافها مع عبلة كامل وعلاقتها بياسمين عبد العزيز

18 حزيران 2022 | القاهرة - "لها"

بدرية طلبة

كشفت الفنانة بدرية طلبة عن حقيقة الخلاف الذي حدث بينها وبين الفنانة عبلة كامل في كواليس تصوير فيلم خالتي فرنسا، ثاني عمل شاركت فيه في مشوارها الفني بعد فيلم "صايع بحر".

قالت بدرية: "في فيلم خالتي فرنسا كنت المفروض ألبس قميص نوم، قلت للمخرج إني هلبس قميص نوم زي بتاع زينات صدقي اللميع، ما يكونش متعري، قال لي تمام خصوصًا إنه ابن بلدي ومحترم وأنا مع عبلة كامل وهي ضد العري ده تمامًا".

وتابعت: "وفي التصوير فوجئت إن الاستايلست جاب لي قميص نوم أحمر صوت وعيطت قلت لهم مين هيلبسه ووقفت التصوير، وللأسف في ناس وصلت لعبلة كامل إني وافقت ألبس القميص ووقت التصوير زنقتهم ورفضت، وعبلة كامل زعلت وسألتني، وقلت لها والله ابدًا".

وردت بدرية على الانتقادات التي وجهت لها بسبب ما وصفه البعص بـ"التطبيل" للفنانة ياسمين عبد العزيز، لحديثها الدائم عنها ودعمها بشكل مستمر، قائلة: "الناس اللي بتقول بطبل لها أه صحبتي وتستاهل وبحبها وهطبل لها وأمسك رق وأتحزم وأرقص لها كمان".

وأضافت: مش مصلحة، في حاجة اسمها عشرة وعيش وملح وصداقة إيه الجديد علشان بشتغل مع ياسمين ما أنا دايمًا بشتغل معاها، وبشتغل مع كتير أوي هطبل لهم كلهم وكل اللي في الوسط صحابي ولو أي حد حصل له حاجة هقف معاه لو ما نقفش جنب بعض هنجيب مين يقف".

وأكملت: "إحنا العشرة اللي بتتولد بينا في الكواليس بتخلينا نقرب من بعض، وحتى لو مش بحب فلانة ولو لقيت حد ضايقها هدافع عنها والمثل بيقول أنا وأخويا على ابن عمي وأنا ابن عمي على الغريب".