بالفيديو - يحيى الفخراني يكشف أسرار أعماله الفنية وسبب رفضه لفيلم "المصير"

25 كانون الثاني 2022 | القاهرة – "لها"

يحيى الفخراني

يواصل الفنان المصري القدير يحيى الفخراني كشف أسرار مشواره الفني الطويل، وذلك في الجزء الثالث من حواره الممتع مع الإعلامية إسعاد يونس في برنامج "صاحبة السعادة" الذي تقدّمه على قناة dmc.

وكشف الفخراني سبب رفضه المشاركة في فيلم "المصير" مع المخرج يوسف شاهين، مشيراً إلى أن شاهين قلّل أجره في العمل. إذ قال: "أنا كنت هشتغل في فيلم "المصير" مع يوسف شاهين واللي رشحني خالد يوسف، وطلب يقابلني وقالي الدور دا محدش يعرف يعمله غيري أنا وأنت بعد ما شوفت شغلك".

وأضاف: "يوسف شاهين إداني السيناريو وقالي اقراه وقول رأيك وكنت مسافر ساعتها وطول السكة كنت بقرأه، ولما وصلت قولتله فيلم كويس بس عايز إعادة حوار لأنه مكنش عاجبني، خصوصاً إن أنا اللي هقول الكلام دا وكان فيه حتة خواجة مش عاجباني، وخالد يوسف قالي دا حدث عالمي إن يوسف شاهين يوافق على تغيير السيناريو والحوار".

وتابع حديثه موضحاً: "وفعلاً اتفقنا على كل حاجة وعلى القبض، وروحت المكتب وكان لازم أقوله اسمي هيتكتب إزاي على الأفيش، وقاللي أنت بطل مطلق واسمك في الأول، بس قالي إننا هنقلل المرتب، والكلمة دي قلقتني جدا وقولتله هفكر، ومشي ورايا لحد الأسانسير وقولتله عندي ظروف، وخالد يوسف لما كلّمني قولتله أنا مش هعمل الفيلم".

وتحدث الفخراني أيضاً عن كواليس فيلم "أرض الأحلام" مع الفنانة فاتن حمامة، لافتاً إلى أنه كبّر ملامحه بالمكياج ليتناسب مع سنّها... وقال: "فاتن حمامة هي اللي اخترتني للدور في فيلم "أرض الأحلام"، وكنت ساعتها مقرر إني مش هعمل أفلام تاني لأني كنت لسه طالع من تجربة وحشة وكنت متعقد ومتضايق ساعتها".

وأضاف: "بس لما عرفت إن فاتن حمامة هي اللي عايزاني وكلّمتني وقالتلي متمسكة بيك عشان أنا عايزة أعمل دور حلو وشايفة إنك عنصر مهم في الفيلم، وكانت تجربة حلوة فعلاً وأول يوم تصوير روحت بدري وقالولي فاتن حمامة عايزة تشوفك".

واستطرد يحيى الفخراني قائلاً: "ودي كانت أول مرة أشوفها على الحقيقة ولاحظت فرق السن بينّا، وكنت مقرر إني مش هحط مكياج، بس حسيت إني لازم أعمل مكياج لأن أول مشهد كنت بعاكسها، ومش ممكن يظهر فرق السن دا وأعمل كدا، الدور مش هيكون لايق".

واختتم بالقول: "عشان كدا كان لازم أكبّر نفسي بالمكياج، وروحت خليت شعري أبيض كأني راجل كبير، وحسيت إن فاتن حمامة بتشتغل بإحساس الهاوي لحد دلوقتي رغم كل العمر دا، والأعمال دي كلها".