بالفيديو - سمية الخشاب تكشف حقيقة خلافها مع وفاء عامر ونصيحتها لشيرين عبد الوهاب

14 كانون الثاني 2022 | القاهرة – "لها"

سمية الخشاب

حلّت الفنانة سمية الخشاب ضيفةً على برنامج "حبر سري" الذي تقدّمه عبر قناة "القاهرة والناس" الإعلامية أسما إبراهيم، في الجزء الأول من الحلقة والتي أُذيعت أمس الخميس ويُذاع الجزء الثاني منها مساء اليوم الجمعة.

ووجّهت سمية خلال الحلقة رسالة إلى الفتيات المقبلات على الزواج، شدّدت فيها على ضرورة ألا تقلّ فترة الخطوبة عن سنة أو سنة ونصف حتى يعرف كل من الطرفين الآخر عن كثب. وأضافت: "لازم تكوني واعية وتسألي عشان مفيش حد يقع في مشاكل، لازم تسألي وتعرفي بيعمل إيه حكايته إيه وأخلاقه وعيلته، دلوقتي الخطوبة وكتب الكتاب ورا بعض على طول دي كارثة على الأقل سنة أو سنة ونص، عشان التمثيل بيقل بعد السنة ونص".

كما تحدثت سمية عن خلافها مع وفاء عامر، بعدما هاجمتها الأخيرة بسبب علاقتها بأحمد سعد ودافعت عن ريم البارودي، قائلةً: "إحنا مش صحاب عشان أقاطعها، وأنا لم أهتم وقتها، فيه حاجات مش بديها أكبر من حجمها، كان لازم أرد وأقول اللي بيته من إزاز ما يحدفش الناس بالطوب مثلاً!. لكن فيه ناس بتحب تزيط عشان يطلعوا تريند".

وعن فكرة الزواج مرة ثانية قالت الخشاب: "أنا مش عايزة أتجوز تاني حرّمت خلاص، أنا كده ملكة والزواج نظام اجتماعي فاشل، وأنا مش بفكر في اللي فات ولا اللي جاي وبركز على الحاضر وده أحسن حاجة، وشروطي لو فكرت أتجوز في يوم، يكون طيب، غني، محترم، وكريم".

ولدى سؤالها ما إذا كانت تقبل أن تكون زوجة ثانية، أجابت: "عمري ما أوافق أكون زوجة تانية لأنه مش صح وبيفشل، أنا مجربتش بس سمعت من اللي حواليا، وشوفنا تجارب فاشلة كتير من صحابنا وقرايبنا وعارفين إنه هيرجع لمراته وأولاده ومش من قلة الرجالة يعني... ممكن أتجوز رجالة مطلقين إنما زوجة تانية لأ، وأول ما بعرف أنه متجوز بنسى الموضوع تماماً وبسأل أول سؤال أنت متجوز ولا لأ؟ أصل ساعات بيقلعوا الدبلة".

وعن أزمة شيرين عبد الوهاب وظهورها حليقة الرأس بعد انفصالها عن حسام حبيب، قالت سمية: "أنا اتصدمت من شيرين عبد الوهاب، لما شوفتها وهي حالقة شعرها؛ لأن زمان لما الواحدة تقص شعرها كان بيكون جوزها مات في الحرب فبتقص شعرها حزناً عليه، والتصرف دا ليه تفاسير نفسية كتير، وشيرين جميلة بشكلها وإحساسها وإحنا بنعشقها وهي قوية لأنها برج الميزان".

وأضافت: "ممكن تكون عايزة تنتهي من حياة تعبت منها، وعايزة تموّتها وتنساها، ودا رد فعل طبيعي أو ممكن يكون رد فعل نفسي عنيف دون تفكير بسبب غلطة ومش عارفة هي رايحة فين وقراراتها صح ولا لأ، في كل الأحوال محدّش يستاهل تتخلّي عن شعرك، دا إحنا بنقعد سنين عشان نطوّله... دي مش محنة، دي تجربة وعدّت وشيرين هتستفاد منها واللي جاي أحلى من اللي فات، وربنا بيعمل الخير لينا، وإحنا بس اللي بنشوف عكس كدا، لأننا بنبص في إطار محدود، وأنا لا يمكن أعمل زيها، أصل عشان مين؟ محدّش يستاهل".

وعلى سؤال: ليه ما اشتغلتيش سينما بعد أفلامك مع خالد يوسف، وليه أفلامك ما نجحتش؟، ردّت الخشاب: "اشتغلت أفلام كتير مثل "ساعة ونصف"، لكن أفلام "حين ميسرة" و"الريس عمر حرب" و"خيانة مشروعة" لم تتكرر". وأضافت: "البطولات الجماعية هيّ اللي بتساعد على نجاح الفيلم، مفيش حد بينجّح فيلم لوحده، البطل لو طلع عمره ما هينجح لوحده، لازم يكون فيه مجموعة عمل متكاملة".

وأكدت سمية الخشاب أنها لا تمانع في العمل مع المخرج خالد يوسف، معقبة بالقول: "لو الورق كويس ليه لأ إيه المشكلة؟ أي حاجة شخصية مليش علاقة بيها مليش دعوة باللي حصله، أنا بروح الشغل وأروح بيتي، مليش دعوة بأزماته الشخصية".