بالفيديو - شريف منير يكشف أسراراً عن الراحلة سهير البابلي وسبب غيابه عن الساحة الفنية

23 تشرين الثاني 2021 | القاهرة - "لها"

شريف منير

فتح النجم المصري شريف منير قلبه خلال لقاء خاص مع الإعلامية لميس الحديدي في برنامج "كلمة أخيرة"، وتحدث عن مشواره الفني الطويل والمرهق والمليء بالأعمال الفنية المميزة، كاشفاً عن أسباب غيابه عن الساحة الفنية.

واستعاد منير بعض ذكرياته اللطيفة مع الفنانة الراحلة سهير البابلي خلال عمله معها، فقال: "مدام سهير كانت من الناس المتحمسة لي جدا. اشتغلت معاها مسلسل (بكيزة وزغلول)، ومسرحية الناس ماشافوهاش لإنها متصورتش اسمها (نص أنا نص إنتي). كان دور مهم جداً بالنسبالي مع سهير البابلي وإسعاد يونس، وأستاذ أسامة عباس، والمخرج حسين كمال".

وأضاف: "أستاذة سهير عندها عفوية غير طبيعية تبان أكتر على المسرح، ارتجال مش معقول مفاجئ، وكانت بتديني ثقة في نفسي كبيرة جداً، ودمها خفيف طول الوقت في الكواليس وعلى المسرح، وسخنة جداً وإيقاعها سريع جداً".

وتابع: "هي كانت ساعات بتنسى الكلام على المسرح وتعرف تلم الموضوع، وإسعاد طبعا أستاذة كانت بتلم معاها كتير، وأنا واقف خيبان في النص. في يوم نسيت الكلام وارتجلت كلام كتير قوي الناس بقت بتتنطط على الكراسي".

وعن مشواره الفني قال شريف منير: "مشواري مش بطّال لكن كان متعب أعقبه الإحساس بالمتعة... وحطّني في حتة أنو لازم آخد بالي من فكرة انتقاء الأعمال والأدوار، ولذلك اختفيت فترة طويلة عن الساحة".

وأضاف: "بتجيلي حاجات مش عجباني وهي أدوار توصف بالنص نص، والناس مش متعودة تشوفني كده ولو تطلب الأمر أفضل قاعد لحد ما ألقي الدور المناسب هعمل كده... بالفعل انتقائي للأدوار أدى الى غيابي ثلاث سنوات".

وأوضح شريف منير أن تاريخ الفني وعمله مع كبار النجوم مثل أحمد زكي ومحمود عبد العزيز وعادل إمام، وبروزه في أدوار مهمة، أمور تجعل المهمة أصعب في انتقاء الأدوار، قائلاً: "يعني مثلاً يجلي دور زي فيلم "أولاد العم" و"سهر الليالي" و"عريس من جهة أمنية".

وأشار إلى أن مسيرته الفنية تلاحقه في اختيار الأدوار، موضحاً: "في ساعات ببقى مزنوق وعايز فلوس وعاوز أشتغل عشان المصاريف، وعندي أقساط والتزامات بس بلاقي نفسي مش قادر أعمل اللي مقتنع بيه، حتى لو كانت شخصية مكررة بس لازم أكون حاببها وهعملها بشكل تاني".