بعد 17 عاماً... مجدي الهواري يكشف سراً كان نقطة فاصلة في مشوار محمد رجب

23 آب 2021

مجدي الهواري

منشور الهواري

استعاد المخرج المصري مجدي الهواري عبر حسابه في "فيسبوك" ذكريات خاصة من كواليس فيلم "الباشا تلميذ" الذي أخرجه قبل 17 عاماً.

وروى الهواري موقفاُ حدث بينه وبين النجم محمد رجب قائلاً: "في يوم من الأيام وأنا باعمل فيلم (الباشا تلميذ)، جالي محمد رجب، وقالي (نفسي تغير نظرة الجمهور لي في أدوار الشر اللي باعملها، مرة مغتصب، ومرة اتهجم على البطلة، ودايما ضد البطل اللي بتحبه الناس. أنا هافضل طول حياتي كده مكروه؟ شوف أنا هاعمل الفيلم ونلعب الدور، لكن كان نفسي تشوفني في حاجة تانية غير دور الشرير ده".

وأضاف: "كان نفسه يلعب دور حمزة اللي عمله رامز جلال، بصراحة صعب علي، قولتله لا اعمل دور (طارق كابو) في الفيلم ده، وهنخليك تعمل حاجة صح يا رجب، وسكت وسمع الكلام الصراحة... لكن هو فضل طول الفيلم يسألني مش هتنفذ وعدك لي، أنا أقوله (عيب يا حماده، أنا وعدتك إنك تعمل حاجة صح)، ومش فاهم حاجة، لكن يضحك ويسكت، ويقولي (ماشي أنا واثق فيك)".

وأكمل: "خلص الفيلم وهو يائس، مبقاش حتى يسألني، لحد ما جيت في آخر مشهد قولتلهم (هاتوا محمد رجب)، وجه في (الفاينال)، وهو مش عارف جاي ليه، في مشهد هو مش فيه أصلاً، وفجأة قولتله (محمد أنت هتنزل من هنا، وتضرب لـ(بسيوني) تعظيم سلام وتقوله (حاولت أعمل حاجة صح)، مكنش مصدّق نفسه، لأنه ده مكنش مكتوب في السيناريو، ولا حد كان عارف، وكانت مفاجأة للجميع وللجمهور كمان، إن يطلع (طارق كابو) هو اللي ساعد البطل، وكان مشهد فارق في حياة محمد رجب مع الناس إلى الآن، وغيّر من بعدها جلده، من شرير الفيلم إلى أدوار كلها طيبة وحنية، وبقى بطل كمان إلى الآن أفلام ومسلسلات، من أصل المشهد ده، سبحان الله".

واختتم الهواري منشوره مؤكداً: "تفوت الأيام وأعمل نفس الريأكشن في مسرحية (يا ما في الجراب يا حاوي)، وكأني باقول تاني بعد 16 سنة (حاولت أعمل حاجة صح)، إن شاء الله تصبح المسرحية علامة فارقة في حياة كل من شارك فيها، بالطاقة الجميلة اللي عند كل أبطالها، زي ما كان عند كل من شارك في فيلم (الباشا تلميذ)".

يُذكر أن فيلم "الباشا تلميذ" عُرض عام 2004، وهو بطولة: كريم عبد العزيز وغادة عادل ورامز جلال وحسن حسني وخالد الصاوي وسليمان عيد، ومن إخراج وائل إحسان.