إيمي سالم ترد على اتهامها بالبحث عن الـ"ترند": "بس يا هايف"

14 آب 2021 | القاهرة – "لها"

إيمي سالم

ردت الفنانة إيمي سالم، على الاتهامات التي وجهت لها، بتعمد إثارة الجدل ومحاولة تصدر الـ"ترند"، بعدما كشفت عن تفاصيل اعتداء محمد سامي عليها، في حفل زفاف الفنانة نيللي كريم، واصفة إياه بأنه لا يتحلى بالأخلاق.

وقالت في منشور عبر خاصية «الإستوري»، بحسابها الرسمي بموقع الصور والفيديو "إنستغرام": "الناس التافهة اللي بتقول إني بدور على «تريند».. بس يا هايف منك له، تريند إيه مع واحد غايب عنه الأخلاق".

وأضافت : «تريند إيه وأنا أصلًا مش باقية على أي حاجة مؤقتة في حياتي.. دا أنا اخترت أروح لندن من سنة عشان أبعد عن السواد والهيافة والنميمة والإحداث وسعوا مدارك التفكير الضيق دا شوية.. كفاية فراغ»

وكانت إيمي أعلنت منذ قليل أنها ترفض اللجوء للمجلس القومي للمرأة، حتى لا تعطي الأزمة أكبر من حقها.

وقالت: "الناس اللي بتقولي أروح لحقوق المرأة وما يلزم من إجراءات رسمية، فأنا مش هاكبر الموضوع أكثر ما هو كبر لأسباب كثيرة، وأنا في يوم من الأيام كنت قريبة جدًا لأفراد عائلته، وأكرر كنت، والواضح أنه امبارح دفع لبعض اللجان".

واختتمت إيمي قائلة: "نظرتي للحياة اتغيرت كتير، أكرر شكري لكل من ساندني بكلماته اللي فعلًا هداني وبسطني إنكم شايفني من هذا المنظور".

كانت إيمي قد روت تفاصيل إهانتها من قبل المخرج محمد سامي، في حفل زفاف الفنانة نيللي كريم.

وكتبت في منشور لها عبر حسابها الرسمي بموقع التواصل الاجتماعي «فيسبوك»، قائلة :"فيه حاجة سيئة حصلت، وكنت في حيرة أكتبها ولا لأ، لكن قررت أكتبها، ورغم إنها حاجة سيئة لكنها حصلت للأسف في يوم سعيد جدا، هو يوم فرح أختي وحبيبتي نيللي كريم، طبعا قبل أي شيء مبروك للمرة المليون لنيللي وكان يوم يجنن وده سبب سكوتي امبارح، لأني كنت عايزة الفرح ميتعكرش صفوه وجماله".

تابعت: "كنت زمان بسمع كلمة إن الفنان الكبير الحقيقي لازم يكون إنسان كبير كمان، بس يمكن إمبارح موقف أكدلي المقولة دي، طبعا كلنا شفنا مسلسل نسل الأغراب في رمضان، المسلسل اللي انتقده نحو الـ300 مليون عربي، اللي انتقده حتى صناع العمل نفسهم وأبطاله كمان، وشفنا فيه إهدار المال بشكل مرعب".

وأضافت: "فيه عمل فني ركيك وضعيف للغاية، الحسنة الوحيدة فيه أسماء أبطاله الكبار جدًّا السقا، وكرارة، حتى الأبطال التانيين أدوارهم انهارت عشان المدام تتلمع، لدرجة إن الشركة المتحدة قررت وقف التعامل مع الأستاذ المخرج من كتر رداءة المسلسل، ودي أول مرة تحصل في تاريخ الدراما لمخرج".

وكشفت إيمي واقعة إهانة محمد سامي لها قائلة: "طيب إيه بقى القصة، القصة إني في رمضان وقت عرض المسلسل، كنت زي كل الفنانين غالبا مش عاجبني المسلسل، فكتبت تعليق على بوست كتبه الصديق أيمن سليم السينارست، وكان تعليق منتقد للمسلسل، والنقد زي ما اتعلمنا جزء من الفن، ولازم الفنان يتقبل النقد لأنه ده الدافع الوحيد لتحسين أدائه وتحسين إنتاجه، لكن إنك تلاقي فنان بياخد النقد على إنه خناقة شخصية، وعركة في شارع ومقاطعة وخلاف".

وتابعت: "أنا مش هحكي عن علاقتي السابقة بإخوات الأستاذ محمد سامي البنات، وبزوج أخته اللي أعرفه قبل ما حتى آجي أعيش في مصر، إمبارح وأنا بتحرك في الفرح، لقيت الأستاذ المخرج المحترم أوي في وشي هو ومراته النجمة الأحادية التي لا تتكرر، فأنا لأني بنت ناس.. ولأني علموني إن انتقاد شيء قدمته في الفن مش خناقة وعركة، فلقيتني بنية صافية بقوله، هتسلم عليَّ ولا مش عايز؟"

وأضافت: "فما كان من الأستاذ محمد سامي المحترم أوي والراجل خالص، حرفيا بيدفعني بإيده بشكل عنيف وبيوسع الطريق لمراته، وكمان بيتلفظ بألفاظ سوقية عني، أنا سكت بس لحسابات، لأن تربيتي أولا متسمحش إني أنزل لمستوى الشوارعية والسوقية ده، وثانيًا عشان الليلة الجميلة لنيللي تفضل ليلة جميلة".

واختتمت: «لكن حبيت أحكي الموقف بشكل علني هنا، عشان نعرف كلنا إزاي الأستاذ المخرج، شخص لا يعرف معنى الفن، ولا الزمالة ولا سمع عن الأخلاق، ولا يعرف ما معنى احترام المرأة، حبيت أقول الكلمتين دول عشان نعرف مين هو محمد سامي، شكرًا يا أستاذ محمد على أخلاقك، اللي فعلا شبهك».