إيمي سالم تكشف "قلة أخلاق" فنان مصري معها في زفاف نيللي كريم

13 آب 2021

ايمي سالم

كشفت الفنانة المصرية إيمي سالم تعرضها للإهانة من مواطنها المخرج محمد سامي في حفل زفاف النجمة نيللي كريم إلى لاعب الإسكواش هشام عاشور... وكتبت عبر حسابها في موقع "فيسبوك": "فيه حاجة سيئة حصلت، وكنت في حيرة أكتبها ولا لأ، لكن قررت أكتبها، ورغم إنها حاجة سيئة، لكنها حصلت للأسف في يوم سعيد جداً، هو يوم فرح أختي وحبيبتي نيللي كريم، طبعاً قبل أي شيء مبروك للمرة المليون لنيللي، وكان يوم يجنن، وده سبب سكوتي إمبارح، لأني كنت عايزة الفرح ميتعكرش صفوه وجماله".

وأضافت: "كنت زمان بسمع كلمة إن الفنان الكبير الحقيقي، لازم يكون إنسان كبير كمان، بس يمكن إمبارح موقف أكدلي المقولة دي، طبعاً كلنا شفنا مسلسل "نسل الأغراب" في رمضان، المسلسل اللي انتقده نحو الـ 300 مليون عربي، اللي انتقده حتى صنّاع العمل نفسهم وأبطاله كمان، وشفنا فيه إهدار المال يشكل مرعب".

وتابعت: "فيه عمل فني ركيك وضعيف للغاية، الحسنة الوحيدة فيه أسماء أبطاله الكبار جداً السقا، وكرارة، حتى الأبطال التانيين أدوارهم انهارت عشان المدام تتلمع، لدرجة إن الشركة المتحدة قررت وقف التعامل مع الأستاذ المخرج، من كتر رداءة المسلسل، ودي أول مرة تحصل في تاريخ الدراما لمخرج".

وأوضحت: "طيب إيه بقى القصة، القصة إني في رمضان وقت عرض المسلسل، كنت زي كل الفنانين غالباً مش عاجبني المسلسل، فكتبت تعليق على بوست كتبه الصديق أيمن سليم السينارست، وكان تعليق منتقد للمسلسل، والنقد زي ما اتعلمنا جزء من الفن، ولازم الفنان يتقبل النقد، لأنه ده الدافع الوحيد لتحسين أدائه وتحسين إنتاجه، لكن إنك تلاقي فنان بياخد النقد على إنه خناقة شخصية، وعركة في شارع ومقاطعة وخلاف".

وأردفت بقولها: "أنا مش هحكي عن علاقتي السابقة بإخوات الأستاذ محمد سامي البنات، وبزوج أخته اللي أعرفه قبل ما حتى آجي أعيش في مصر، إمبارح وأنا بتحرك في الفرح، لقيت الأستاذ المخرج المحترم أوي في وشي هو ومراته النجمة الأحادية التي لا تتكرر، فأنا لأني بنت ناس... ولأني علموني إن انتقاد شيء قدّمته في الفن مش خناقة وعركة، فلقيتني بنية صافية بقوله، هتسلم علي ولا مش عايز؟ فما كان من الأستاذ محمد سامي المحترم أوي والراجل خالص، حرفيا بيدفعني بإيده بشكل عنيف وبيوسع الطريق لمراته، وكمان بيتلفظ بألفاظ سوقية عني، أنا سكت بس لحسابات، لأن تربيتي أولا متسمحش إني أنزل لمستوى الشوارعية والسوقية ده، وثانيا عشان الليلة الجميلة لنيللي تفضل ليلة جميلة".

واختتمت إيمي سالم منشورها مؤكدةً: "لكن حبيت أحكي الموقف بشكل علني هنا، عشان نعرف كلنا إزاي الأستاذ المخرج، شخص لا يعرف معنى الفن، ولا الزمالة ولا سمع عن الأخلاق، ولا يعرف ما معنى احترام المرأة، حبيت أقول الكلمتين دول، عشان نعرف مين هو محمد سامي، شكرًا يا أستاذ محمد على أخلاقك، اللي فعلا شبهك".