محمد فؤاد يكشف مفاجأة عن "بوستر" أغنيته الأخيرة "أحكيلك"

18 شباط 2021 | القاهرة – "لها"

محمد فؤاد

كشف الفنان محمد فؤاد أن أغنية "الحفلة" التي قدّمها أخيراً بأسلوب المهرجانات، اختار أن تخرج للجمهور بصورة محترمة ولائقة. وأوضح أن اللوك الذي ظهر به على بوستر أغنية "أحكيلك" هو من صنع ابنه إذ قال: "ده شغل عبد الرحمن ابني، والفريق بتاعه وهو اللي مصورني، وبسيبهم يقولولي إلبس كده اعمل كده وعاملين طفرة وتغيير فعلاً، والهاف بوت اللي أنا كنت لابسه في الصورة ده بتاع عبد الرحمن نفسه، وأنا قولتله بلاش بيلمع وكنت لابس واحد تاني مطفي واتصورت بيه ولما شوفنا الصورة قالي اسمع الكلام البس التاني، وأنا عايز أشكره هو وفريقه".

وأضاف: "إحنا عملنا خطة إن مفيش ألبوم هينزل تاني خالص انتهت كلمة ألبوم، أنا بأعلنها النهاردة نهاية عصر كلمة ألبوم، ممكن نستحدث شيء معين إنما مش ألبوم، إنما لابد نرجع للنهج اللي انتهجته العظيمة أم كلثوم حيث كانت تقدم حفلة أول خميس من كل شهر فكانت في حالة من المتابعة، أنا محضرتهاش ولكن كان والدي الله يرحمه يحكي لنا، وكانت الست عاملة حالة تسويقية للبلد في هذا اليوم، وصل الأمر إنه يقولك إيه اللي بيتباع في اليوم ده وكان إيه طقوس البيت المصري فيه، وده معناه ذكاء الربط الدائم بينك وبين الناس".

واختتم محمد فؤاد بالقول: "يعني ميبقاش محمد فؤاد قاعد سنتين عقبال ما يعمل ألبوم أو سنة ونص، أنت كل 20 يوم عايزين منك تطرح أغنية وتكون لطيفة جداً يعني حاجة تنزل تبقي الناس مستقبلاها بشكل مش هو اللي كان في دماغهم، بس أنا هحاول طبعا ميحصلش ده، يعني اللي خلاني أستني سنين طويلة لطرح ألبوم ببقي حذر جداً منه إن يتقال عليه كده أو يقع بعد الشر يعني بنسبة قليلة جداً ممكن أكون أخفقت في حاجة وده لازم يحصل طبعا، لكن المهم أن كل أغنية بتنزل مينفعش تكون شاكك فيها، يعني لو أغنية أنا شاكك فيها مش هنزلها أنزل غيرها عندي البديل لابد أن يكون الإنتاج جيد".