ممثل مصري يكشف: لم يسأل عني أحد في فترة مرضي

كشف الفنان الشاب كريم سرور عن تعرضه لوعكة صحية شديدة خلال الأيام الماضية، لدرجة أنه لم يستطع الحركة أو النهوض من مكانه.

وعاتب كريم الكثيرين على عدم سؤالهم عنه، رغم مروره بهذه الحالة الصحية الصعبة، كاتباً عبر حسابه في "فيسبوك": "أنا كدة بقالي ٤ أيام حرفياً مش قادر أتحرك ولو روحت الحمام دي تبقى معجزة من عند ربنا وموارب باب الشقة عشان الديليفري بتاع الصيدلية أو المطعم لما ييجي يدخل علطول عشان مش هقدر بجد أقوم افتح الباب".

وتابع: "المهم إني نزلت ستوري لعلاجي الكتير والحقن اللي باخدها وكتبت إني تعبان جداً ومعظم أصحابي عارفين إني عايش لوحدي.. الكوميديا كلها بقي إنه جالي ٣ مكالمات بالظبط من ناس هما آه أصحابي طبعاً لكن مش قريبين وبنتقابل كل فترة كبيرة.. وكام مسدج كده من نوعية مالك يابني فيه إيه ومش هنحسب الريبلايز بتاعة الستوري عشان ده هنعتبره مجرد كومنت كده وأنا مش هحسب الكومنتات إنها اهتمام أكيد".

وأضاف كريم: "طب ليه أنا بكتب الكلام ده.. لإني فاكر كويس إن فيه فترات كنت شغال كتير ومنتشر والناس ساعتها كلها كانوا مهتمين أوي بيا.. فخر الشلة بقي ومع الوقت بتحصل تموجات وعلو وهبوط.. اللي مضايقني جداً جداً إن من ضمن ٣٤٠٠ شخص شافوا الاستوري يجيلي ٣ مكالمات ومش ناس قريبة أصلاً.. اللي هو فكرة إن حتى القريبين منك هيحبوك على أساس نشاطك الحالي مش لشخصك".

وأشار كريم إلى أنه يمر بهذه الحالة كثيراً بسبب تقرّحات في المعدة، تؤدي الى آلام شديدة، مضيفاً: "أنا بقول الكلام ده وأنا صاحي بقالي ساعتين بحاول أقوم أدخل المطبخ أسخن شوربة الخضار وأجيب مياه عشان العلاج ومش قادر وحرارتي مرتفعة بشكل كبير فالموضوع أشبه بالتخريف .. بس حسيت إني معنديش قدرة على المقاومة فعلاً وحبيت أفضفض شوية.. لو نكدت عليكم حقكم عليا ولو مش فارق معاكم ف ده كان شيء متوقع من الأول.. وأنا بالكتير بكره أو بعده هكون كويس جداً وهستعيد نشاطي وحيويتي بكل سهولة".

يُذكر أن كريم سرور شارك في سباق رمضان الماضي بمسلسل "فرصة تانية" مع الفنانين: ياسمين صبري وهبة مجدي وأحمد مجدي ودياب وهنادي مهنى.

مقالات ذات صلة

فنان شاب يكشف تعرضه لحادث سير وإصابته بتضخم في الكبد

كريم سرور