حفيد حسن حسني يوجه رسالة رثاء مؤثرة: "البهجة راحت معاك"

06 حزيران 2020

حسن حسني

بعد أيام من وفاة الفنان حسن حسني إثر أزمة قلبية مفاجئة، عبر حفيده حسن هشام عن معاناته من فراقه وأجمل ذكرياته مع الراحل بكلمات مؤثرة تفاعل معها عدد كبير من المتابعين.

ونشر الشاب على فيسبوك مجموعة من الصور العفوية الجميلة التي تجمعه بجده بمراحل عمرية مختلفة ووجه له رسالة من القلب قال فيها: "أي حد لما كان بيعرف إني حفيدك كنت بلاقي فرحة في عينه ونظرة احترام وتقدير.. الحاجات دي كانت دايما بتفرحني وببقى شايف قد إيه الناس حباك، حتى لو ما اتعاملتش معاك شخصيًا، وقد إيه أنا فخور إنى حفيدك ومتشرف".

وتابع: "وجود اسمك في بطاقتي واني شايل اسمك كان بالنسبالي امان وفخر وعشان كده كنت دايما واخد بالي في معاملتي مع الناس واني اتعلمت منك ان حب الناس بالدنيا كلها وفكرة اني شايل اسمك دي مسؤولية كبيرة".

وأضاف: "بحاول دايما اني ابقى ناجح عشان اشرفك عشان انت دايما كنت واقف في ظهر كل واحد فينا انا و اخواتي اللي هما كل احفادك وكنت دايما بتنصحني واكتر حاجات نصحتني بيها هي حب الناس وان مشوار الألف ميل بيبدأ بخطوة واني ما أيأسش وكمان حضرتك بركتنا ومثلنا الأعلى وعلمتنا فعل الخير وعودتنا دايما اننا نتجمع ونخاف على بعض وكنت دايما بتخاف علينا من اصغرنا لكبرنا".

وأكمل رسالته: "كانت الناس دايما بتسألني عنك وعن معاملتك معانا كنت دايما باقولهم انك بركتنا وقد ايه طيب وحنين ومصدر البهجة في العيلة وانك ظهرنا اللي اتكسر دلوقتي واللي الناس ماتعرفوش انك كنت بتضحكنا عالحقيقة اكتر من ورا الكاميرا وان تقريبا كل الشخصيات اللي مثلتها احنا عشناها".

وتابع كلامه "عشان دايما كنت مش بتحب تتعبنا ومش بتقل علينا فضحكت علينا و سبتنا في 24 ساعة مع اني كان نفسي تفضل معانا لغايه لما تشوفني انا وكل اخواتي الـ5 في بيوتنا وتشوف اولدنا.. لكن امر الله نفذ ولا اعتراض على قضاء ربنا والبهجة راحت معاك ومصر و الدول العربية كلها عزونا وحسوا بآلامنا لانك كنت موجود داخل كل بيت واجيال كتير اتربت على افيهاتك وكنت فعلا جوكر عشان زي ما بتعرف تضحكنا زي ما بتعرف تبكينا".

واختتم رسالته "انا فعلا محظوظ اني اتولد حفيدك واني شايل اسمك وعارف انك دلوقتي في مكان احسن بكتير وانك مع جدتي وبنتك اللي كانت اقرب حد ليا واللي من ساعة فراقها وانت تعبان ودلوقتي حضرتك ارتحت فيا رب ابقى محظوظ اكتر واحصلكوا وابقى مرتاح معاكوا عما قريب إن شاء الله اشوفك على خير".