بالفيديو - أحمد فلوكس يكشف للمرة الأولى سبب طلاقه لهنا شيحة

02 أيار 2020 | القاهرة (لها)

هنا شيحة وأحمد فلوكس

حلّ الفنان أحمد فلوكس ضيفاً على برنامج "شيخ الحارة والجريئة" الذي تقدمه المخرجة إيناس الدغيدي على قناة "القاهرة والناس"، حيث أكد أنه يتمنى أن يرتبط بسيدة جميلة كانت زميلته في المدرسة، متابعاً: "أنا بحب أهزر مع الناس على السوشيال ميديا علشان كده قولت الكلام ده على حسابي.. ولكن الرجالة محتاجة فلوس كتير علشان يتجوزوا .. لأن الراجل بيعمل كل حاجة، وأكتر حاجة بتضايقني في الجواز كلمة "بنشتري راجل" لأن الجملة دي لو اتقالتلي هسيبها وهمشي .. جملة صعبة جدا".

وتابع: "أنا مادخلتش الفن عن طريق والدي بالعكس هو كان رافض.. أنا دارس إعلام قسم تصوير.. وأبويا كان عاوزني أشتغل في البيزنس.. وبالفعل أنا دلوقتي فاتح شركة.. لأن الفن مابقاش هو اللي تربينا عليه.. وأكبر دليل على كلامي، أني كنت بروح الجامعة بميكروباص.. يعني تعبت في البداية".

وعن سر انفصاله عن الفنانة هنا شيحة أضاف: "ماكنتش عاوز أطلق هنا شيحة لأن هنا جميلة جداً ومن الناس اللي قابلتهم ومايتعوضوش.. كانت بتحبني جداً.. وست بمليون راجل.. ولكن أنا كراجل صعب.. صعيدي حتي لو ماروحتش الصعيد طول عمري .. وعصبي جدا.. وفي نفس الوقت هنا مايتفرطش فيها بسهولة بس هي اللي طلبت، وطبيعي اللي هتطلبه هنا هعملهولها لغاية ما أموت".

وأكد أنه لم يتدخل في عمل هنا خلال فترة زواجهما، مشيراً إلى أن مشاركتها في فيلم "الديزل" كانت قبل زواجهما، حيث كانت وقعت على الفيلم، ولكن لو كنا متزوجين وقتها وسألتني بالتأكيد كنت سأرفض، "ماكنتش شايفها فرصة ليها".

ورفض فلوكس ما أثير عن أن النجم محمد رمضان يرفض أن يضمه لأعماله السينمائية والدرامية، قائلاً، "انا مابشتغلش مع أي حد، انا اللي بنقي اللي بشتغل معاهم.. ماحدش يجبرني أشتغل مع حد.. أنا بعد عادل إمام ومحمود عبد العزيز مابتكلمش على نجوم.. محمد رمضان صاحبي واشتغلنا في أكتر من مسلسل.. عمري ما اتغريت على حد.. التمثيل شغلانة "الأنا".. وهو ده اللي اتعلمته من أبويا.. شاركت كممثل كومبارس في أغنية الدنيا مجنونة وخدت 50 جنيه".

وتابع: "مش ندمان على فيلم 30 يوم في العز مع السبكي.. فأنا كنت محتاج أشتغله جداً.. لأنه بيميل للطبقة الشعبية وديه طبقة أنا بحبها.. رغم أننا من أسرة أرستقراطية.. ولكن مش هشتغل مع السبكي تاني.. هو منتج جميل محترم وبيحب الفن وطيب.. لكن عندي خلاف معاه أنه لا ينفذ اتفاقياته.. مابيدفعش أصلا.. وباقيلي 20 ألف جنيه".

وحول تقديمه لشخصية أنور وجدي في مسلسل "أنا قلبي دليلي"، قال فلوكس، "كان ممكن أمثل أنور وجدي بشكل أفضل من كده .. رغم إني راضي عن أدائي .. فأنا اعتمدت على أفلامه فقط .. كان ذكي لكن عصبي جدا".

وحول سؤاله عمّن هو نجم مصر حاليا، فقال فلوكس، "السقا مدرسة كلنا جرينا وراها.. أما عز لما اشتغلت معه في الممر لقيته بيشتغل على نفسه بشكل مش طبيعي وبيحترم كل الناس.. أما أمير فتعب جداً في حياته وأخد السلم من تحت.. وأعرفه من أيام الجامعة".