بالصور - نجم "الهيبة" يهاجم أسرتها ومخرجها... لماذا قال له لا تجرؤ؟

19 أيلول 2018

سامر كحلاوي وتيم حسن

هاجم الممثل السوري سامر كحلاوي مخرج مسلسل "الهيبة" سامر البرقاوي وأسرة المسلسل، بسبب كلام الأخير عنه في حوار أجراه لمجلة "لها".

وقال كحلاوي، الشهير بشخصية "الدب" في حسابه على تطبيق "انستغرام": "حابب خبرك يا سيد سامر برقاوي، وكمان حتى الناس تعرف الحقيقة...حضرتك عطيتني شخصية الدب و هو عالورق كومبارس وليس دور (بعلم التمثيل شخصية الدب المكتوبة على الورق تسمى شبه دور لأنها غير واضحة الملامح والتفاصيل ولا تسمى دور)".

وكان البرقاوي أجاب، رداً على سؤال حول كحلاوي قائلاً: "لن أُضيّع وقتي في الردّ على هذه المهاترات الكلامية، وخصوصاً إذا كانت صادرة عن سامر كحلاوي الذي أعطيته فرصة في الجزئين الأول والثاني ولم ينتهزها في تطوير أدائه التمثيلي".

وأضاف "الدب": "بجهدي و تعبي عملت من شبه الدور دور و بطل والناس حبتو و حكت فيه بحمد الله، متل كل الأدوار الأولى... ف لا تقول أنك عطيتني فرصة الله يرضى عليك...وهالشي اللي صار بالجزء الأول خلاكن تتفاجأوا كلكن وتقولوا لحالكن: مين هال سامر كحلاوي ليقدر يعمل دور بطل من شبه دور مكتوب عالورق كومبارس؟..و ما حبيتوا فكرة إني أسرق ضو من أبطال العمل ومن ناس حضرتكن عم تصنعوهن ليصيروا نجوم...ف قررتوا تتآمروا علي بالجزء التاني بهدف أنكن تحرقوني، وعملتوا اللي عملتوه من تهميش مقصود للشخصية ومن حذف لمشاهد أنا مصورها".

وتابع كحلاوي بقوله: "على سيرة إني ما طورت أدائي التمثيلي، فحابب خبرك بأنو محبة الناس لشخصية الدب اللي مكتوبة كومبارس هي أكبر دليل على أنو الأداء كان إحترافي والناس قالت كلمتها بهالخصوص.... ولا تنسى موضوع اللهجة البقاعية يا سيد سامر، واللي أتحدى أي ممثل سوري يقدر يجيبها بهالحرفية، لدرجة أنو ما حدا عم يصدق إني ممثل سوري، وهاد الشي الفضل فيه لرب العالمين لا إله إلا هو، ولجهدي وتعبي في دراسة تفاصيل الشخصية من جميع جوانبها، بهدف خلق دور واضح الملامح من لا شيئ".

وختم: ".جرب عطيني دور مهم و بتشوف بعينك كيف إني بقدر بإذن الله أطفي نجوم حضرتك عم تتعامل معهن و متبنيهن ...بس أنا متأكد من أنك لا تجرؤ عهالشي... هاي الحقيقة و لازم الناس تعرفها، ويشهد الله على كلامي....إذا ربنا كتبلي إستمر بهالمهنة فالأيام بتحكم بيناتنا يا سامر برقاوي ... بئس الفن في الوطن العربي...فن الشللية والمافيات والعلاقات الشخصية".